Լատվիայի Հանրապետության արտաքին գործերի նախարարությունը անհանգստացած է Տավուշի մարզում Ադրբեջանի եւ Հայաստանի զինված ուժերի միջեւ իրավիճակի սրմամբ եւ փոխադարձ կրակոցներով: (Խոսքը Հայաստանի Տավուշի մարզի մասին է՝ հայ-ադրբեջանական սահմանի հյուսիսարեւելյան հատվածում- խմբ., Սակայն, Լատվիայի ԱԳՆ հայտարարության անգլերեն տարբերակում նշվում է վերոնշյալ տարբերակը)։ Այդ մասին հաղորդում է Լատվիայի ԱԳՆ պաշտոնական կայքը։
«Այդ միջադեպերը լուրջ սպառնալիք են ստեղծում խաղաղության եւ կայունության համար, որոնք կյանքեր են խլել երկու կողմերից: Արտաքին գործերի նախարարությունը կողմերին կոչ է անում անհապաղ դադարեցնել ռազմական գործողությունները եւ վերականգնել հրադադարը: Հայաստանն ու Ադրբեջանը պետք է խուսափեն հետագա գործողություններից կամ հայտարարություններից, որոնք կարող են հանգեցնել հակամարտության հետագա սրմանը:
Հայտնի է Լատվիայի դիրքորոշումը Լեռնային Ղարաբաղի հակամարտության վերաբերյալ: Լատվիան աջակցում է յուրաքանչյուր երկրի ինքնիշխանությանը եւ տարածքային ամբողջականությանը, ինչպես սահմանված է Հելսինկիի եզրափակիչ ակտում եւ ԵԱՀԿ Փարիզյան խարտիայում: Լատվիան կարծում է, որ Լեռնային Ղարաբաղի հակամարտությունը կարող է լուծվել միայն խաղաղ ճանապարհով եւ ԵԱՀԿ Մինսկի խմբի շրջանակներում միջազգային իրավունքի սկզբունքների հիման վրա:
Արտաքին գործերի նախարարությունը լիովին աջակցում է ԵԱՀԿ Մինսկի խմբին եւ նրա երեք համանախագահներին հրադադարի վերականգնմանն ուղղված իրենց ջանքերում: Արտաքին գործերի նախարարությունն ակնկալում է, որ երկու կողմերը զերծ կմնան ուժի կիրառումից եւ կաշխատեն ղարաբաղյան հակամարտության խաղաղ լուծման ուղղությամբ»,- ասված է հայտարարության մեջ:
