Հուլիսի 16-ին Վիեննայում տեղի է ունեցել ԵԱՀԿ Մշտական խորհրդի նիստ, որի օրակարգում, հայկական պատվիրակության նախաձեռնությամբ, ներառվել եւ քննարկվել է Հայաստանի պետական սահմանի հյուսիսարեւելյան մասի վրա Ադրբեջանի զինված հարձակման հարցը:
ԱԳՆ մամուլի ծառայության հաղորդմամբ, ԵԱՀԿ-ում Հայաստանի մշտական ներկայացուցիչ Արմեն Պապիկյանը ներկայացրել է հուլիսի 12-ից տիրող իրավիճակը, ինչպես նաեւ Ադրբեջանում դրան նախորդող գործընթացները, որոնք վկայում են պլանավորված հարձակման մասին:
Հայաստանի ներկայացուցիչն ընդգծել է, որ Ադրբեջանի նախագահը, ով հայտնի է Հայաստանի, մասնավորապես, մայրաքաղաք Երեւանի, ինչպես նաեւ Զանգեզուրի նկատմամբ տարածքային իր պահանջներով, ով անընդհատ բողոքում է, որ «ժամանակակից Հայաստանը հիմնված է ադրբեջանական հողերի վրա», վերջին ամիսներին իր հրապարակային ելույթներում վերադարձել է ռազմատենչ հռետորաբանությանը՝ հավաստիացնելով իր ժողովրդին, որ Ադրբեջանը ի զորու է լուծել ղարաբաղյան հակամարտությունը ռազմական ճանապարհով։ Նա ընդգծել է, որ հայկական պատվիրակությունը մշտապես ԵԱՀԿ անդամ-պետությունների ուշադրությունը հրավիրել է Ադրբեջանի ղեկավարության կողմից խրախուսվող եւ աջակցվող հակահայկական ատելության քարոզչության վրա:
«Մենք սա դիտարկում ենք որպես Ադրբեջանի իշխանությունների գործիք` արտաքին թշնամու դեմ հասարակությանը միավորելու եւ ուշադրությունը ներքին խնդիրներից՝ բռնապետական կառավարում, կոռուպցիա, մարդու իրավունքների եւ հիմնարար ազատությունների ամոթալի խախտումներ, շեղելու համար»,- ասել է Պապիկյանը:
Դեսպանը նշել է, որ ատելությունը հասել է այնպիսի վտանգավոր մակարդակի, որը կարող է հանգեցնել ռազմական բախումների, եւ նույնիսկ լայնածավալ ագրեսիայի՝ ինչպես Հայաստանի պետական սահմանին, այնպես էլ շփման գծում: Պապիկյանը Մշտական խորհրդին տեղեկացրել է ադրբեջանական բանակի կողմից ականանետերից եւ «Գրադ» սարքերից Բերդ քաղաքի, Այգեպար, Մովսես, Չինարի, Վերին Կարմիրաղբյուր գյուղերի հրետակոծման մասին: Հրետակոծությունների հետեւանքով վնասվել են բնակելի շենքեր եւ քաղաքային ենթակառուցվածքներ: Պապիկյանը ընդգծել է Այգեպար գյուղում մանկապարտեզի հրետակոծման փաստը:
Պապիկյանն ընդգծել է, որ առաջին անգամ չէ, երբ Ադրբեջանը միտումնավոր գնդակոծում է քաղաքացիական բնակչությանը եւ ենթակառուցվածքները, դա տեղի է ունեցել նաեւ 2016-ի ապրիլյան պատերազմի ժամանակ, երբ միջազգային մարդասիրական իրավունքի կոպիտ խախտումներ են կատարվել ադրբեջանական բանակի կողմից: Սա ոչ այլ ինչ է, քան ատելության, հայ ժողովրդի հանդեպ անհանդուրժողականության դրսեւորում: «Նման պահվածքը պետք է միանշանակ դատապարտվի, եւ ռազմական ղեկավարությունը պետք է դրա համար լիարժեք պատասխանատվություն կրի»,- ասել է Պապիկյանը:
Նա նաեւ նշել է, որ առաջին անգամ չէ, որ Ադրբեջանը իր հրետանային մարտկոցները տեղակայում է բնակավայրերում՝ դրանով իսկ սպառնալիքի տակ դնելով սեփական քաղաքացիների կյանքը: «Այսպիսի դատապարտելի մարտավարությունը նոր չէ, այն օգտագործվել է ապրիլյան պատերազմի ժամանակ: Սա ցույց է տալիս, որ Ադրբեջանի ռազմական եւ քաղաքական ղեկավարությունը բացարձակապես շահագրգռված չէ իր ժողովրդի անվտանգությամբ, էլ չենք խոսում Հայաստանի եւ Արցախի ժողովրդի անվտանգության մասին»,- ասել է Պապիկյանը:
Նա շնորհակալություն է հայտնել ԵԱՀԿ գործող նախագահին՝ հավասարակշռված հայտարարության, ինչպես նաեւ Հայաստանի գործընկերների եւ բարեկամ երկրների համարժեք արձագանքի համար:
Դեսպանն առանձին անդրադարձել է Թուրքիայի կողմից արված հայտարարություններին՝ դրանք բնութագրելով որպես Ադրբեջանի վարքագծի ուղղակի խրախուսանք, որը ներկա լարված իրավիճակում բացարձակապես անպատասխանատու է եւ անընդունելի: Նա ընդգծել է, որ Հայաստանի սահմանին տիրող լարվածությունը եւս մեկ անգամ վկայում է, որ խաղաղություն հաստատելու, ժողովուրդներին խաղաղության նախապատրաստելու համար նախեւառաջ անհրաժեշտ է նվազեցնել Ադրբեջանի կողմից ռազմական ուժի սպառնալիքի հնարավորությունը, ինչպես նաեւ ուժեղացնել ԵԱՀԿ գործող նախագահի անձնական ներկայացուցչի գրասենյակի կողմից մոնիթորինգի հնարավորությունները։
Դեսպանը հույս է հայտնել, որ նախաձեռնությունները, որոնք ուղղված են ժողովուրդների միջեւ վստահության հաստատմանը, խաղաղությանը նպաստող պայմանների ստեղծմանը եւ ժողովուրդներին խաղաղության նախապատրաստմանը, տարածաշրջանում կայունության ապահովման միակ միջոցն են:
