Ինձ թվում է, որ եթե հայ-ադրբեջանական սահմանին իրավիճակը զարգանա այնպես, ինչպես զարգանում է, եթե լարվածության սրությունը զրոյանա կամ եթե ամեն ինչ մնա քիչ թե շատ այնպես, ինչպես հիմա է, ապա Ադրբեջանի ղեկավարությունը ստիպված կլինի այս ամենը բացատրել իր ժողովրդին: Այս մասին NEWS.am-ի թղթակցի հետ զրույցում ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը՝ մեկնաբանելով նոր հնարավոր հրաժարականներն Ադրբեջանում։
Ըստ քաղաքագետի՝ միանգամայն տրամաբանական կլիներ ենթադրել, որ նման իրավիճակում ինչ-որ մեկին պետք կլինի հանձնել, քանի որ նման հանգամանքներում այդպիսի բան հաճախ է պատահում: «Դա կարող են շատ տարբեր մարդիկ լինեն, տարբեր մակարդակների պաշտոնյաներ, եւ դա կախված է այն պատճառներից, որոնք ես հիմա չեմ կարող հստակ դիտարկել»,- ասաց փորձագետը՝ նշելով, որ Ադրբեջանը, ընդհանուր առմամբ, շատ դժվար է ուսումնասիրել՝ դրա փակվածության պատճառով:
Իսկանդարյանը կարծում է, որ, ամենայն հավանականությամբ, հաջորդ հրաժարականները կլինեն ուժային գերատեսչություններում։
