Ուկրաինայի իրավապահներին հաջողվել է կապ հաստատել Լուցկում ավտոբուսի ուղեւորներին պատանդ վերցրած ահաբեկչի հետ։ Այս մասին ճեպազրույցում հայտարարել է Ուկրաինայի ՆԳ նախարար Արսեն Ավակովը ճեպազրույցում, հայտնում է 112.ua-ն:
«Մենք կապի մեջ ենք այն անձի հետ, ով պատանդ է վերցրել մարդկանց: Նրա հետ արդեն խոսում են, բանակցում են»,- ասել է նախարարը:
Ավակովը նաեւ խնդրել է լրագրողներին ուշադիր լուսաբանել ահաբեկչի վերաբերյալ տեղեկատվությունը, քանի որ դա կարող է վնասել իրավիճակին:
«Ես կխնդրեի բոլորին լինել ուշադիր եւ կոմպետենտ, այդ թվում՝ պատանդներին պահող անձի մասին չհաստատված տեղեկություններ տարածելիս»,- ասել է Ավակովը:
Նա պարզաբանել է, թե ավելի վաղ տեղեկություններ էին տարածվել, որ ահաբեկիչը բուժում է ստացել հոգեբուժարանում՝ այդ տեղեկությունները անվանելով ոչ ճիշտ: Ավակովը հիշեցրել է, որ հանցագործը սմարթֆոն ունի եւ կարող է հետեւել այն տեղեկատվությանը, որ ԶԼՄ-ները տարածում են նրա մասին: «Դա չի օգնում, այլ լրացուցիչ լարվածություն է ստեղծում»,- ընդգծել է նախարարը:
Նա հավաստիացրել է, որ իրավապահ մարմինները արդեն կապ են հաստատել ահաբեկչի հարազատների հետ եւ փորձում են բոլոր մեթոդները՝ հարցը խաղաղ ճանապարհով լուծելու համար:
