Լուցկում ավտոբուսի ուղեւորներին պատանդ վերցրած ահաբեկիչը երեք մարդու բաց է թողել: Այս մասին երեքշաբթի հայտարարել է երկրի ՆԳՆ ղեկավար Արսեն Ավակովը:
«Ազգային ոստիկանության պետի տեղակալ Եվգենի Կովալը բերել է երեք պատանդների»,- գրել է նախարարը Twitter-ում:
Ընդ որում, նա հրապարակել է տեսանյութ, որում երեւում է, թե ինչպես է ոստիկանական համազգեստով տղամարդը հեռանում ավտոբուսից՝ ուղեկցելով երկու կանանց եւ մեկ երեխայի: Ըստ ուկրաինական ԶԼՄ-ների՝ ահաբեկիչը ազատ է արձակել հղի եւ տարեց կանանց:
Ինչպես «112 Ուկրաինա» հեռուստաալիքի եթերում հավելել է երկրի ՆԳ փխնախարար Անտոն Գերաշչենկոն, վիրավորին, որը գտնվում է ավտոբուսում, «օգնություն է ցուցաբերվել, վերքը վիրակապվել է»: Նա նաեւ ասել է, որ ավտոբուսում մնում է մոտ 10 մարդ: