Ներկայիս ժամանակաշրջանը աստղագիտության «ոսկե դարն» է, ոլորտն արագ տեմպերով է զարգանում: Այս մասին այսօր՝ հուլիսի 22-ին, Հայաստանում STARMUS VI միջազգային փառատոնի անցկացմանը նվիրված համաժողովում ասաց Փառատոնի խորհրդի անդամ, Astronomy ամսագրի գլխավոր խմբագիր Դեւիդ Էյքերը:
Նրա խոսքով՝ Astronomy ամսագրի հիմնական նպատակն է ոլորտը հանրաճանաչ դարձնելը, բնակչության լայն շերտերի համար տեղի ունեցողի հասանելիության եւ հասկանալիության ապահովումը: Նա տեղեկացրեց, որ ամսագիրը շուրջ 100 հազար բաժանորդ ունի եւ համացանցում մոտ 2,5 մլն հետեւորդ: Նա վստահ է, որ բաժանորդներն ու համացանցում հետեւորդները հետաքրքրությամբ են հետեւելու Հայաստանում առաջիկա փառատոնի ընթացքին: Առավել եւս, որ նախատեսված փառատոնը պարունակելու է բազմաթիվ առանձնահատկություններ եւ նոր նախաձեռնություններ, ինչպիսին է, օրինակ, աստղալուսանկարչության դպրոցը: «Մենք նրանց կծանոթացնենք Հայաստանի երկնքի, Հայաստանում աստղագիտության հարուստ պատմության հետ, երկիր կգան մեծ թվով հայտնի աստղագետներ: Այսօրվանից սկսած՝ մենք փառատոնի մասին տեղեկություններ ենք տարածելու ԱՄՆ-ում եւ ոչ միայն»,- հայտարարեց նա:
