Հուլիսի 17-ին Մինսկում տեղի ունեցած ԵՏՄ Միջկառավարական խորհրդի նիստում քննարկված հարցերից մեկն էր սննդամթերքի անվտանգությունը, մասնավորապես՝ կենդանական ծագման արտադրանքում հակաբիոտիկների խնդիրը: Այս մասին հուլիսի 23-ին Մոսկվա-Բիշքեկ-Երեւան-Մինսկ առցանց տեսակամուրջի ժամանակ ասաց Եվրասիական տնտեսական հանձնաժողովի Կոլեգիայի տեխնիկական կարգավորման հարցերով անդամ (նախարար) Վիկտոր Նազարենկոն:
Նրա խոսքով՝ ԵՏՄ երկրներից յուրաքանչյուրը հարցի իր ըմբռնումն ունի, եւ հիմա Եվրասիական Միջկառավարական խորհուրդը հանձնարարել է ստեղծել բարձր մակարդակով միջգերատեսչական աշխատանքային խումբ՝ «Սննդամթերքի անվտանգության մասին» տեխնիկական կանոնակարգում փոփոխությունների վերջնամշակման եւ համաձայնեցման նպատակով:
Նազարենկոն նշեց, որ փոփոխություններ են նախատեսվում անասնաբուժական դեղամիջոցների մնացորդների (դեղագործական ակտիվ նյութերի) առավելագույն թույլատրելի մակարդակների հաստատման մասում, որոնք կարող են պարունակվել ինչպես չվերամշակվող, այնպես էլ վերամշակվող կենդանական ծագման սննդամթերքի մեջ: «Փոփոխությունների նշված նախագծի ներկայացումը Եվրասիական տնտեսական հանձնաժողով նախատեսված է մինչեւ 2020 թվականի դեկտեմբերի 1-ը»,- հավելեց պաշտոնյան:
