ԵՄ երկրները պետք է անհապաղ միջոցներ ձեռնարկեն 5G ցանցերի համար իրենց մատակարարների դիվերսիֆիկացման ուղղությամբ, հայտարարել է Եվրահանձնաժողովը:
Անցյալ տարվա նոյեմբերին ԵՄ-ն համաձայնեց կոշտ դիրքորոշում ընդունել 5G մատակարարների նկատմամբ՝ հաջորդ սերնդի բջջային ցանցերի համար կիբերանվտանգության ռիսկերը մեղմելու նպատակով, որոնք որպես տնտեսական աճի եւ մրցունակության արագացման բանալի են դիտարկվում, հայտնում է Reuters-ը:
Ռազմավարությունը երկրների ռւ հեռահաղորդակցման օպերատորների՝ մեկ մատակարարից կախվածության նվազեցում էր ենթադրում։
«Խնդիրներ են հայտնաբերվել կապի առանձին բջջային օպերատորների համար կամ ազգային մակարդակով համապատասխան ռազմավարությունների մշակման եւ ներդրման ժամանակ՝ տեխնիկական կամ շահագործման հետ կապված դժվարությունների պատճառով»,- նշվում է հայտարարության մեջ:
Հանձնաժողովը նաեւ կոչ է արել ԵՄ 13 երկրներին անհապաղ ուղիղ արտաքին ներդրումների ստուգման մեխանիզմ ներդնել՝ գործիք, որը ԵՄ կառավարություններին թույլ է տալիս միջամտել ռազմավարական ակտիվների մեջ օտարերկրյա ուղիղ ներդրումների դեպքերին, հատկապես՝ երբ խոսքը պետության կողմից վերահսկվող կամ պետության կողմից ֆինանսավորվող ձեռնարկությունների մասին է։