Քիչ առաջ հեռախոսազրույց եմ ունեցել Հայկ Սարգսյանի հետ եւ նա տեղեկացրեց, որ ինքը որեւէ միջոցառում չի կազմակերպել: Այս մասին, այսօր՝ հուլիսի 27-ին, լրագրողների հետ հանդիպման ժամանակ նշեց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառանալով տարածված լուսանկարներին ու տեսանյութին, որտեղ ԱԺ «Իմ քայլը» խմբակցության պատգամավոր Հայկ Սարգսյանի մասնակցությամբ փարթի է ընթանում:
«Նա ինձ ասաց, որ մի քանի օրով գտնվում է հանգստյան գոտում, որտեղ նաեւ այլ քաղաքացիներ հանգստանում են: Տեղեկացրեց, որ անզգուշություն է թույլ տվել մի պահ գտնվելով այդ վայրում, որը եղել է մարդաշատ եւ եղել է առանց դիմակի: Հայկ Սարգսյանը հայցում էր «Իմ քայլը» խմբակցության ներողամտությունը, որ անզգուշություն է թույլ տվել եւ դիմակ չի կրել այդ պահին: Իմ տեղեկություններով, Հայկ Սարգսյանը պետք է որ իր գործողությունների համար տուգանված լինի»,-ասաց Մակունցը:
Դիտարկմանը, որ այդ հանգստյան գոտին կապվում է Հայկ Սարգսյանի անվան հետ, «Իմ քայլի» ղեկավարը նախ խորհուրդ տվեց այդ հարցն ուղղել հենց Հայկ Սարգսյանին, ապա հավելեց. «Նա ինձ ասաց, որ որեւէ կապ չունի ոչ հանգստյան գոտու, ոչ էլ միջոցառում կազմակերպելու հետ: Ամբողջ խստությամբ պատժամիջոցները կկիրառվեն նաեւ նրա նկատմամբ: Խոսքն այն մասին է, որ ՀՀ քաղաքացին, թեկուզ անզգուշաբար դիմակ չի կրել»:
Նշենք, որ ըստ մամուլի տեղեկությունների երեկ երեկոյան Սեւանի ափին մեծ փարթի է կազմակերպել «Իմ քայլը» խմբակցության պատգամավոր Հայկ Սարգսյանը, որտեղ մասնակիցները առանց դիմակի էին, նաեւ նարգիլե են օգտագործել: Այսօր արդեն համացանցում տարաբնույթ քննարկումների առիթ է դարձել երեկվա փարթին: