Մեքսիկայի նախագահ Անդրես Մանուել Լոպես Օբրադորը հայտարարել է, որ դիմակ կդնի միայն այն ժամանակ, երբ երկիրը կոռուպցիան արմատախիլ անի, հայտնում է The Guardian-ը:
«Գիտե՞ք՝ երբ եմ պատրաստվում դիմակ դնել: Երբ կոռուպցիա չի լինի: Այդ ժամանակ ես դիմակ կդնեմ եւ կդադարեմ խոսել»,- լրագրողներին ասել է Մեքսիկայի նախագահը:
«Եկեք գործարք կնքենք: Այնպես որ՝ եկեք շտապենք եւ կոռուպցիային վերջ տանք, որ ես դիմակ դնեմ եւ դադարեմ խոսել»,- հավելել է նա:
Պարբերականը նշում է, որ իր գործընկերների՝ Բրազիլիայի եւ ԱՄՆ նախագահների նման Լոպես Օբրադորը չափազանց թերահավատորեն է վերաբերվում կորոնավիրուսային համավարակի շրջանում դիմակներ կրելուն:
Նա երբեք չի խրախուսել դիմակների կրումը եւ պաշտպանական այս միջոցը կրել է միայն այն ժամանակ, երբ դա անհրաժեշտ էր անել հանրությանը ներկայանալիս, օդային ուղեւորությունների ժամանակ:
Նշվում է, որ նախագահի այս հայտարարությունը որոշ մեքսիկացիներ ընկալել են որպես ակնարկ, որ նա երբեք դիմակ չի կրի:
