Առնվազն 18 ոստիկան է տուժել Բեռլինում խոշոր հակակառավարական ցույցը ցրելու հետեւանքով, հաղորդում է DW-ը։
Երեք սպա հոսպիտալացվել է, հայտնել են Բեռլինի ոստիկանությունից։
Ընդհանուր առմամբ ցույցերի նախօրեին Բեռլինում ներգրավվել էր 1 100 ոստիկան։
Հիշեցնենք, որ նախօրեին Բեռլինում անցկացվել է մասշտաբային ակցիա ընդդեմ կորոնավիրուսի համավարակի հետ կապված սահմանափակումների։
Տեղական ժամանակով 12.00-ին մեկնարկել է քայլերթ, որի մասնակիցները շարժվել են քաղաքի կենտրոնական փողոցներով։ Ոստիկանության հաղորդմամբ՝ մի քանի ժամ անց մասնակիցների թիվը հասել է 15 հազարի։
Նշվում է, որ ցույցի մասնակիցներից գրեթե ոչ ոք չէր կրում դիմակ։ Որոշ մասնակիցների ձեռքում կային դրոշներ տարբեր դաշնային հողերի խորհրդանիշերով։
Միջոցառումն անցել է «Ազատության օր՝ վերջ համավարակին» կարգախոսի ներքո։ Ցուցարարները քայլերթից հետո մասնակցել են զանգվածային հանրահավաքի։
