Դատարանն ուժի մեջ թողեց ՀՀ երկրորդ նախագահ Ռոբերտ Քոչարյանին եւ նախկին փոխվարչապետ Արմեն Գեւորգյանին պատկանող գույքի կալանավորման մասին որոշումը:
Փաստաբանների միջնորդությունները քննարկվում են արդեն երկու նիստերին:
Լսելով փաստարկները` դատավոր Աննա Դանիբեկյանն արտահայտեց իր համաձայնությունը պաշտպանական կողմի այն կարծիքի հետ, որ գնահատումը պետք է իրականացվի քննիչի կողմից, բայց նշեց, որ առաջարկել է պաշտպանությանն իր սեփական գնահատումն անցկացնել` գործընթացն արագացնելու համար: Պաշտպանական կողմը հրաժարվեց դա անել, եւ դատարանը հարգում է այդ դիրքորոշումը: Սակայն նա չի կարող լուծել հարցը` առանց գույքի գնահատման, եւ հարցի ամբողջականությունն ուսումնասիրելուց հետո կվերադառնա հարցին: «Հայցի քննարկումը հետաձգվում է մինչեւ գույքի արժեքի որոշումը»,- ասաց դատավորը:
Փաստաբան Ալումյանն առարկություն հայտնեց` հայտարարելով, որ դատարանը փաստացի կարծիք է հայտնել, որ քննիչի ապօրինի որոշումը կարող է որոշ չափով մնալ ուժի մեջ: Այսինքն, դատարանը բավարարել է քննիչի որոշման անօրինականության մասին իր որոշումը` հակասելով ինքն իրեն, եզրափակեց փաստաբանը` հավելելով, որ ապօրինի որոշումն ուժի մեջ է մնացել անորոշ ժամկետով: Դատավորի գործողությունների դեմ արտահայտվեցին նաեւ փաստաբաններ Հովհաննես Խուդոյանը եւ Էրիկ Ալեքսանյանը:
Դատավորը հայտնեց, որ Սեդրակ Քոչարյանի ներկայացուցիչ Սեդրակ Ասատրյանը նույնպես միջնորդություն է ներկայացրել գույքի կալանքը չեղյալ հայտարարելու մասին, ինչպես նաեւ` քաղաքացի Սամվել Մանասարյանը: Հաշվի առնելով, որ դրանք կապված են Հայկ Ալումյանի եւ Էրիկ Ալեքսանյանի միջնորդությունների հետ` այդ միջնորդությունները եւս կքննարկվեն ավելի ուշ:
Նիստում տասնհինգ րոպեանոց ընդմիջում հայտարարվեց:
