ՀՀ երկրորդ նախագահ Ռոբերտ Քոչարյանի փաստաբան Արամ Վարդեւանյանը նախկին նախագահի գույքի կալանքի չեղարկման եւ նիստի հետաձգման հետ կապված նոր միջնորդություն է ներկայացրել:
Դատավորի հարցին, թե որն է նիստի հետաձգման պատճառը, փաստաբանը պատասխանեց, որ քննարկվող հարցը ենթադրում է սեփականության իրավունք, եւ մինչ այդ հարցը լուծելը այլ միջնորդություններ քննարկելը կազդի աշխատանքի արդյունավետության վրա:
Փաստաբանը հայտնեց, որ խնդրում է հետաձգել նիստը փորձագետի դիմելու համար եւ գնահատելու գույքը՝ խոստանալով տվյալներ ներկայացնել հաջորդ նիստին:
Նախկին փոխվարչապետ Արմեն Գեւորգյանի փաստաբան Էրիկ Ալեքսանյանը համաձայնեց այդ կարծիքի հետ:
Դատախազ Գեւորգ Բաղդասարյանը բացասական արտահայտվեց՝ հայտարարելով, որ հետաձգման պատճառն անհիմն է, իսկ միջնորդության կրկնակի դիտարկումը՝ տարօրինակ: Տուժած կողմի ներկայացուցիչները համաձայնեցին մեղադրանքի հետ:
Արամ Վարդեւանյանը նշեց, որ դատարանը կարող էր պարզապես չեղարկել քննիչի անօրինական որոշումը, սակայն դա չարեց՝ միջնորդության քննարկումը պայմանավորելով կարեւոր հանգամանքի՝ գույքի գնահատմամբ պարզաբանմամբ: «Պարզաբանման հարցը մեզ վրա ենք վերցնում»,-նշեց նա:
Դատավոր Աննա Դանիբեկյանը հիշեցրեց, որ փաստաբանները հնարավորություն ունեին գնահատել գույքը, սակայն րանց դիրքորոշումն այլ էր, եւ այդ պատճառով դատարանը նիստը հետաձգելու անհրաժեշտություն չի տեսնում: Միեւնույն ժամանակ, նա նշեց, որ փաստաբանները գույքի գնահատման հարցով իրենց գործողություններում սահմանափակված չեն:
