ՀՀ բնապահպանության նախարարությունը հայտարարել է, որ Ամուլսարում իրավիճակի սրման հետ կապված անելիք չունի: Ընդ որում, մենք բոլորս հիանալի հասկանում ենք, որ Ամուլսարի խնդրի լուծման բանալին այս գերատեսչության ձեռքում է: Օգոստոսի 5-ին «Ամուլսար. Հասարակական և մասնավոր շահերի նոր դիմակայություն» թեմայով տեսաբանավեճի ժամանակ այս մասին ասաց Գնդեվազ գյուղի բնակչուհի, բնապահպան Հերմինե Ենոքյանը:
Ըստ բնապահպանի` նախարարությունում ամբողջ պատասխանատվությունը ցանկանում են դնել ոստիկանության վրա, բայց ակնհայտ է, որ ոստիկանության խնդիրը երկրում օրենքի եւ կարգուկանոնի ապահովումն է: «Ամուլսարի խնդրի գլոբալ լուծման համար անհրաժեշտ է անվավեր ճանաչել ավելի վաղ կնքված բոլոր պայմանագրերը»,- ասաց Ենոքյանը:
Մեկնաբանելով Ամուլսարի շրջանում վագոն-տնակների տեղադրման հետ կապված իրավիճակը, որոնցում հետագայում պետք է տեղակայվեն Lidian Armenia-ի վարձած մասնավոր անվտանգության ծառայության աշխատակիցները` բնապահպանը նշեց, որ այդ վագոնները պատկանում են համայնքին եւ առանց որեւէ մեկի իմացության չէին կարող մասնավոր օգտագործման հանձնվել:
