Անցյալ տարի Լիբանանի անվտանգության գլխավոր ծառայություններից մեկը նախարարների կաբինետին հայտնել է Բեյրութի նավահանգստում պայթուցիկ քիմիական նյութերը պահելու վտանգի մասին: Այս մասին Associated Press-ին տված հարցազրույցում ասել է Լիբանանի մաքսային վարչության ղեկավար Բադրի Դահերը:
Ըստ նրա` պետական անվտանգության ծառայությունն անցած տարվա ընթացքում ուսումնասիրում էր ամոնիումի նիտրատի պաշարները: Նա նշել է, որ վտանգի մասին տեղեկացվել է նախարարների կաբինետին, գլխավոր դատախազին եւ պետական հաստատություններին:
Նա հաստատել է, որ 2017-ին նամակ է ուղղել դատավորին, որում նախազգուշացրել է «վտանգի մասին, եթե նյութերը մնան պահեստում», եւ դատավորին խնդրել է ցուցումներ տալ:
Դահերն ասել է, որ ինքն ու մաքսային վարչության նախորդ ղեկավարն ընդհանուր առմամբ վեց նամակ են ուղարկել, բայց երբեք պատասխան չեն ստացել:
Հիշեցնենք, որ Բեյրութի նավահանգստում 2750 տոննա ամոնիումի նիտրատ է պայթել, որի հետեւանքով զոհվել է ավելի քան 150 մարդ, վիրավորվել է մոտ 5000-ը: