Միացյալ Նահանգները մասնագետների կողմից հաստատման դեպքում մոտ 600 միլիոն դեղաչափ կորոնավիրուսի դեմ պատվաստանյութ կարտադրեն: Այս մասին Սպիտակ տան ղեկավար Դոնալդ Թրամփն ասել է օգոստոսի 11-ին կայացած մամուլի ասուլիսին, փոխանցում է ՏԱՍՍ-ը:
«Մենք մի քանի լավ լուր ունենք պատվաստանյութերի վերաբերյալ... Մենք համաձայնություն ենք ձեռք բերել (ԱՄՆ բիոտեխնիկական) Moderna ընկերության հետ` կորոնավիրուսի դեմ պատվաստանյութի 100 միլիոն դեղաչափի արտադրության եւ մատակարարման վերաբերյալ,- ասել է Թրամփը լրագրողներին:- Դաշնային կառավարությունը կֆինանսավորի չափաբաժինների գնումը, մենք դրանք կգնենք»: Նախագահը հիշեցրել է իշխանությունների համագործակցության մասին պատվաստանյութի մշակմամբ զբաղվող այլ ընկերությունների հետ:
«Երեք թեկնածու պատվաստանյութ այժմ մոտեցել է կլինիկական փորձարկումների երրորդ եւ վերջին փուլին: Մենք ներդրումներ ենք կատարում պատվաստանյութերի մշակման եւ արտադրության մեջ,- նշել է նա:- Զինվորականները պատրաստ են ապահովել վեց թեկնածու պատվաստանյութի արագ տեղափոխումը, երբ (պատվաստանյութերը) ամբողջությամբ հաստատվեն Սննդամթերքի եւ դեղամիջոցների սանիտարական վերահսկման վարչության (FDA) կողմից: Մենք շատ արագ շարժվում ենք դեպի հաստատումը»:
«Մենք պատվաստանյութի 100 միլիոն դեղաչափի արտադրության ճանապարհին ենք, երբ պատվաստանյութը հաստատվի: Դրանից հետո կարող է շատ արագ լինել նաեւ 500 միլիոն դեղաչափ, այդպիսով կլինի 600 միլիոն դեղաչափ»,- ասել է Սպիտակ տան ղեկավարը:
Ինչպես նշել են Սպիտակ տանը, վեց պատվաստանյութի մշակման մեջ պետական ներդրումների ընդհանուր ծավալը ավելի քան 12 միլիարդ դոլար է կազմում: Բացի այդ, վարչակազմը համագործակցում է հարակից բժշկական պարագաների` ամպուլների, ներարկիչների եւ այլն, արտադրությամբ զբաղվող ընկերությունների հետ: Նաեւ դեղամիջոցների ավելի քան 140 կլինիկական փորձարկում է իրականացվում, իսկ FDA-ն արտոնագրեր է տրամադրել ավելի քան 200 թեստի համար, որից գրեթե 170-ը մոլեկուլային է, մոտ 40-ը` հակամարմինների առկայության, իսկ երկուսը` հակագենների առկայության:
