Ամերիկյան Մայամիում Curated ավտոսրահը հազվագյուտ Cizeta V16T սուպերքար է ստացել։ Այս նմուշը, որը նախկինում պատկանել է Բրունեյի սուլթանին, կապույտ գույն ունեցող միակ օրինակն է:
Մեքենան եղել է Բրունեյի սուլթան Հասանալ Բոլկիախի մեքենաների հսկայական հավաքածուում, որի ընդհանուր արժեքը գնահատվում է միլիարդավոր դոլարներ: Վինտաժային սպորտային մեքենաների ուղղությամբ մասնագիտացող Curated ընկերությունը սուլթանից ավտոմեքենան մոտ վեց ամիս առաջ է գնել եւ այժմ պատրաստվում է այն վաճառքի հանել, հայտնում է Motor-ը:
Առաջին Cizeta V16T-ը ներկայացվել է 1998թ.։ Մեքենան դարձել է Lamborghini-ի նախկին ինժեներ Կլաուդիո Ջամպոլիի, երաժշտական պրոդյուսեր Ջորջիո Մորոդերի եւ Miura-ի արտաքինի համար պատասխանատու դիզայներ Մարչելո Գրանդինիի համագործակցության պտուղը: Ի սկզբանե նախատեսվել է Cizeta-ն ավելի նմանեցնել Lamborghini Diablo-ին, բայց հետագայում այդ գաղափարից հրաժարվել են:
Երկու զույգ «կույր» լուսարձակներով անսովոր կուպեի հավաքումը սկսվել է 1991 թվականին: Նախատեսվել է տարեկան մոտ 40 մեքենա թողարկել, բայց մինչեւ 1995 թվականը հավաքվել է ընդամենը 19 օրինակ, իսկ 1999 թվականից մինչեւ 2006 թվականը՝ եւս երեքը, այդ թվում՝ մեկ ռոդսթեր:
Սուլթանի նախկին Cizeta-ն ներկայացվել է 1993-ին՝ Ժնեւի ավտոսրահում: Մեքենան համարյա դուրս չի եկել ճանապարհներ՝ այն մասնակցել է մամուլի համար միջոցառումներին եւ գովազդային նկարահանումներին: 27-ամյա կուպեն ընդամենը 981 կիլոմետր վազք ունի:
Որքան կպահանջեն ամենաթանկարժեք Cizeta V16T-ի համար, դեռեւս անհայտ է, քանի որ կուպեն դեռ վաճառքի չի դրվել: 90-ականներին մեքենան գնահատվում էր 650-850 հազար դոլար:
