Սլովենիան ապահովել է պաշտպանությունը «ավտորիտար սպառնալիքներից», ներառյալ՝ «մարդկանց եւ տեղեկատվության վերահսկման» Չինաստանի փորձերը: Այս մասին Սլովենիայում հայտարարել է ԱՄՆ պետքարտուղար Մայք Պոմպեոն՝ անվտանգ 5G ցանցի զարգացման մասին հռչակագրի ստորագրման արարողությունից հետո:
«Իրավիճակը շրջվում է Չինաստանի Կոմունիստական կուսակցության դեմ՝ ազատությունը սահմանափակելու նրա ջանքերում»,- ասել է Պոմպեոն, փոխանցում է Reuters-ը:
Telekom Slovenia-ն անցյալ ամիս սկսել է գործարկել իր 5G ցանցը, եւ ակնկալվում է, որ մինչեւ տարեվերջ 5G կունենա երկրի մեկ երրորդ մասը:
Պոմպեոն ասել է, որ սլովենյան պաշտոնյաների հետ բանակցությունների եւս մեկ կարեւոր թեմա կլինի էներգետիկ անվտանգության ապահովումը` երկրի կախվածությունը Ռուսաստանից նվազեցնելու հաշվին: «Մենք խոսեցինք հաջորդ սերնդի միջուկային տեխնոլոգիաների հսկայական ներուժի մասին՝ մաքուր, հուսալի եւ դիվերսիֆիկացված էներգիա մատակարարելու համար, ինչը կօգնի ապահովել Սլովենիայի եւ ողջ տարածաշրջանի քաղաքական անկախությունը եւ տնտեսական բարգավաճումը»,- ասել է նա:
