Բելառուսն առայժմ օգնության խնդրանքով չի դիմել Հավաքական անվտանգության պայմանագրի կազմակերպության (ՀԱՊԿ) քարտուղարություն: Այս մասին շաբաթ օրը ՏԱՍՍ-ին հայտնել է ՀԱՊԿ մամուլի քարտուղար Վլադիմիր Զայնետդինովը:
«Այս պահի դրությամբ ՀԱՊԿ քարտուղարությունը Բելառուսի կողմից օգնության որեւէ խնդրանք չի ստացել», - նշել է Զայնետդինովը:
Ինչպես նա հստակեցրել է, բելառուսական կողմից նման խնդրանքի դեպքում այն կքննարկվի կազմակերպության կողմից սահմանված կարգով: «Օգնության տրամադրման հիմքերը բերված են Հավաքական անվտանգության պայմանագրի 4-րդ հոդվածում (նվիրված է ՀԱՊԿ անդամ պետության դեմ որեւէ երկրի կամ երկրների ագրեսիային) եւ կազմակերպության կանոնադրության մեջ: Սակայն օգնության վերաբերյալ բոլոր որոշումները ընդունվում են միայն ՀԱՊԿ անդամ բոլոր երկրների հետ համապատասխան խորհրդակցություններից հետո», - պարզաբանել է մամուլի քարտուղարը:
