Կառավարության կողմից նախաձեռնված` 2020-2025 թթ. «Յուրաքանչյուր ընտանիքի՝ առանձին բնակարան» ծրագրով նախատեսվում է կառուցել տարեկան մինչեւ 1000 բնակարան: Այս մասին NEWS.am-ի գրավոր հարցմանն ի պատասխան հայտնեցին Արցախի էկոնոմիկայի նախարարությունում:
Ծրագիրը գտնվում է մշակման փուլում, այդ թվում հաշվարկման ընթացքում է նախագծի իրականացման համար անհրաժեշտ ֆինանսական միջոցների չափը:
Ինչպես ավելի վաղ NEWS.am-ին հայտնել են Արցախի աշխատանքի, սոցիալական եւ բնակարանային հարցերի նախարարության մամուլի ծառայությունում, ծրագիրը կմեկնարկի 2021թ. հունվարի 1-ից: Նախագծի շահառուներ կհանդիսանան այն ընտանիքները, որոնցում ընտանիքի յուրաքանչյուր անդամի բնակելի մակերեսով ապահովվածությունը պակաս է 7 ք/մ-ից։
Բացի այդ, բնակարաններ կտրամադրվեն նաեւ այն դեպքերում, եթե նույն տանիքի տակ բնակվում են մեկից ավելի ընտանիքներ։
Նախագծի մշակման ընթացքում կվերանայվեն պետական աջակցության գործող ծրագրերը: Մասնավորապես, նախատեսվում է բնակարանների ձեռք բերման եւ բնակելի տների կառուցման համար տրամադրվող հիփոթեքային վարկերի մասով գործող սահմանափակումների արմատական վերանայում, հիփոթեքային ծրագրերից արտոնյալ պայմաններով օգտվող սոցիալական խմբերի ընդլայնում: