10 մլն ԱՄՆ դոլար կուղղվի անտառների վերականգնմանը եւ կստեղծվեն հարյուրավոր նոր աշխատատեղեր։ Այս մասին ֆեյսբուքյան իր էջում գրել է Շրջակա միջավայրի նախարար Ռոմանոս Պետրոսյանը։
Նա, մասնավորապես, գրել է.
«10 մլն ԱՄՆ դոլար կուղղվի անտառների վերականգնմանը եւ կստեղծվեն հարյուրավոր նոր աշխատատեղեր
Միջազգային համագործակցության կարեւորությունը շրջակա միջավայրի նախարարության առաջնային ուղղություններից է։ Մենք կարեւորում ենք միջազգային ֆինանսական հոսքերի ուղղումը բնապահպանական տարբեր ծրագրերի իրականացմանը, քանզի համաշխարհային էկոհամակարգը միասնական ու ամբողջական օրգանիզմ է, ու այդ օրգանիզմի առողջ ու կենսունակ լինելու համար խիստ անհրաժեշտ է միասնական ջանք ու ներդրում։
Եվ ի ուրախություն մեզ՝ օգոստոսի 19-ին «Կանաչ կլիմայական հիմնադրամը» բավարարել է Հայաստանի կողմից 2019 թվականին ներկայացված հայտը․ որի արդյունքում շուտով Հայաստանին կտրամադրվի 10 մլն դոլարի չափով դրամաշնորհ՝ անտառների վերականգնման, դիմադրողականության հզորացման, ժամանակակից տնկարանների հիմնման ու գյուղական համայնքներում այլընտրանքային էներգետիկայի զարգացման աջակցությանն ուղղված ծրագրեր իրականացնելու նպատակով։
Ծրագիրը լուծում է ոչ միայն կենսական նշանակության բնապահպանական խնդիր, այլ իր մեջ պարունակում է ոչ պակաս կարեւոր սոցիալական տարր․ արդյունքում համայնքներում կստեղծվեն հարյուրավոր աշխատատեղեր։
Ծրագիրը կիրագործվի ՄԱԿ-ի պարենի եւ գյուղատնտեսության կազմակերպության եւ շրջակա միջավայրի նախարարության բնապահպանական ծրագրերի իրականացման գրասենյակի կողմից։
Ծրագրի ընդհանուր բյուջեն կազմում է 18.7 մլն ԱՄՆ դոլար (ներառյալ 10 միլիոն ԿԿՀ եւ 5.9 մլն` Կառավարության կողմից)»։
