Գերմանիայի եւ Ֆրանսիայի առաջնորդները Բելառուսում տիրող քաղաքական ճգնաժամի սրումը քննարկել են Կոտ դ’Ազուրում նախագահ Էմանուել Մակրոնի ամառային նստավայրում:
Գերմանիայի կանցլեր Անգելա Մերկելի հետ երկու ժամ տեւած հանդիպման արդյունքներով մամուլի ասուլիսում Ֆրանսիայի նախագահը հայտարարել է, որ Եվրամիությունը կարող է միջնորդ հանդիսանալ Բելառուսում կողմերի միջեւ երկխոսության մեջ:
Մակրոնն ասել է, որ բելառուս ժողովուրդը պետք է ինքնուրույն լուծում գտնի, բայց Բրյուսելը պատրաստ է օգնել, եւ պնդել է, որ Ռուսաստանը ներառվի երկխոսության մեջ:
Ըստ նրա՝ Բելառուսի նախագահ Ալեքսանդր Լուկաշենկոն դժկամորեն է ընդունել առաջարկը, որ Եվրոպայում անվտանգության եւ համագործակցության կազմակերպությունը (ԵԱՀԿ) ստանձնի միջնորդի դերը:
Նա ասել է, որ Ռուսաստանի նախագահ Վլադիմիր Պուտինը դրականորեն է արձագանքել ԵԱՀԿ-ի դերակատարման առաջարկությանը, հայտնում է Reuters-ը:
