Հնարավոր է՝ էլեկտրամոբիլները 15-25 տոկոսով էժանանան։ Համենայնդեպս, դա է ապացուցում Nio ընկերության օրինակը, որը ներկայացրել է նոր՝ «մարտկոցը որպես ծառայություն» (BaaS) բիզնես մոդել, փոխանցում է «Ռոսիյսկայա գազետան»։
Ըստ դրա պայմանների՝ ավտոտերերը ստիպված չեն լինի վճարել մարտկոցի համար, որն ավանդականորեն էլեկտրամոբիլի ամենաթանկարժեք տարրն է։ Այն կարող են հեշտ կերպով վարձակալել եւ ցանկացած պահի փոխել ամբողջությամբ լիցքավորվածով։ Արդյունքը պետք է գերազանցի սպասումները։ Այսպես՝ Nio ES8 եւ ES6 քրոսովերները Չինաստանում վաճառում են 65 100 եւ 49 700 դոլարով, իսկ BaaS տարբերակով դրանք գնահատվում են արդեն համապատասխանաբար՝ 55 000 եւ 39 600 դոլար։ Մարտկոցի վարձակալումը կարժենա ընդամենը ամսական 140 դոլար։
Մարտկոցը կարելի է ստանալ Nio-ի լցակայաններից ցանկացածում, Չինաստանում արդեն կա 143 լցակայան, ինչպես հայտնում է Reuters-ը, ընկերությունն ամեն շաբաթ շահագործման է հանձնում մեկական լցակայան, իսկ 2021 թվականին նախատեսում է ստեղծել այդպիսի եւս 300 օբյեկտ։ Մարտկոցը փոխելու համար պահանջվում է ընդամենը 3 րոպե։
Ծառայության մշակմամբ զբաղվում է հատուկ ստեղծված կոնգլոմերատը, որի մեջ Nio-ից եւ եւս մի շարք ընկերություններից բացի, մտնում է մարտկոցների խոշոր արտադրող CATL-ը։ Այլ խոսքով՝ Չինաստանում նման փորձը կարող է տարածվել։ Մասնավորապես համանման մարտկոցներ են օգտագործվում BAIC ավտոմեքենաների վրա։