Իսրայելի եւ Արաբական Միացյալ Էմիրությունների միջեւ կնքված նորմալացման պայմանագիրը ենթադրում է, որ եթե Թուրքիայի նախագահ Ռեջեփ Թայիփ Էրդողանը չփոխի կուրսը, Թուրքիան կդիտվի որպես Մերձավոր Արեւելքում խաղաղության գլխավոր խոչընդոտ, կարծում է տարածաշրջանային վերլուծաբան Ռաման Գավամին:
ԱՄԷ-ն դարձել է Պարսից ծոցի առաջին արաբական երկիրը, որը հարաբերությունները կարգավորելու պայմանավորվածություն է ձեռք բերել Իսրայելի հետ: Էրդողանն այս քայլը անվանել է պաղեստինյան գործի «դավաճանություն»:
Իսրայելը եւ ԱՄԷ-ն ստորագրել են համաձայնագիր, որը «հիմնված է տարածաշրջանի ապագան ձեւավորելու համար ուժերի միավորման, ոչ թե սահմանների պրակտիկ գործոնների վրա»,- Washington Examiner-ում հրապարակված իր հոդվածում գրել է Գավամին:
Փորձագետի խոսքերով՝ Թուրքիան գնալով ավելի հաճախ է դառնում «տարածաշրջանում իսլամական ծայրահեղականության հիմնական հովանավորը»:
Թուրքիայի հանդեպ Վաշինգտոնի ձախողված քաղաքականությունը եւ Անկարայի շարունակվող անդամակցությունը ՆԱՏՕ-ին չկանխատեսված օգնել են Էրդողանին «ընդլայնել իր ավտորիտար քաղաքականությունը երկրի ներսում եւ դրա սահմաններից դուրս» եւ աջակցել պաղեստինյան ՀԱՄԱՍ շարժմանն ու «Մահմեդական եղբայրներ»-ին, նշում է հեղինակը:
Տարածաշրջանային դաշնակիցներ Սաուդյան Արաբիան եւ ԱՄԷ-ն համաձայն են, որ Իսրայելի հետ խաղաղ գործարքի վերջին փորձը՝ նախաձեռնություն, որը երկու անգամ ձախողվել է 1981 եւ 2002 թվականներին, կխաթարվի իսլամիստներին աջակցող պետությունների կողմից, ինչպիսիք են Թուրքիան, Կատարը եւ Իրանը: Նրանք բոլորը օգտագործում են իսրայելա-պաղեստինյան հարցը` բնակչության մեջ միջկրոնական պառակտում հրահրելու եւ բռնություն գործադրելու համար:
Գավամին Իսրայելի եւ ԱՄԷ-ի միջեւ գործարքը անվանել է «հաջորդ քայլ՝ Պարսից ծոցի երկրների եւ Իսրայելի միջեւ դաշինքի ամրապնդման համար՝ թուրքական եւ իրանական իսլամիզմի դեմ»: