Առաջին կիսամյակում ՀՆԱ 5,7% անկումը կապված է եղել շինարարության ոլորտի իրավիճակի հետ: Իրականում պանդեմիան մեծ վնաս է հասցրել հենց այդ ոլորտին: Այս մասին այսօր՝ օգոստոսի 28-ին, մամուլի ասուլիսի ժամանակ հայտարարեց «Ամերիա» խորհրդատվական ընկերության տնօրեն Տիգրան Ջրբաշյանը: Նրա խոսքով՝ երկրորդ տեղում է մեծածախ եւ մանրածախ առեւտուրը, երրորդ տեղում՝ անշարժ գույքին առնչվող գործարքները: Դրանք միասին գեներացնում են 5,71% տնտեսական անկման գրեթե 3,2 տոկոսային կետը:
Նա նշեց, որ ամենամեծ վնասը հասցվել է շինարարության ոլորտին, սակայն ոլորտն այսօր վերականգնման զգալի դինամիկա է ցուցաբերում: «Սակայն այստեղ անհրաժեշտ է հաշվի առնելով, որ շինարարության ոլորտում ապրիլ-մայիս ամիսներին եղել է աղետալի իրավիճակ, եւ չնայած դինամիկային՝ չենք հասել սկզբնական մակարդակին»,-հայտարարեց նա:
Ջրբաշյանը նշեց, որ տուրիզմի ոլորտում եւս լուրջ անկում է գրանցվել: Այսպես, հյուրանոցային բիզնեսի եւ հասարակական սննդի կետերի ոլորտի անկումը կազմում է 0,77 տոկոսային կետ: Այդ ոլորտի վրա իրավիճակի ազդեցությունը դեռ կշարունակվի՝ վստահություն է հայտնել Ջրբաշյանը:
Նրա խոսքով՝ կան որոշակի խնդիրներ նաեւ արդյունաբերության ոլորտում:
Ընդ որում, նա կոչ արեց հաշվի առնելով, որ ոլորտի անկման խնդիրը կապված է ոչ միայն ճգնաժամի, այլ նաեւ համեմատության բազայի հետ: Փորձագետը հիշեցրեց, որ անցած տարվա հուլիսին վերսկսվել են Թեղուտի հանքավայրում աշխատանքները, ինչը հանգեցրել է այդ շրջանում ցուցանիշների զգալի աճին: Քանի որ համեմատություններ են արվում հենց այդ ցուցանիշների հետ, ցուցանիշների հետ կապված խնդիրներ են առաջանում: «Չկա ոլորտ, որտեղ տնտեսական անկում չի գրանցվել, ամենուր մինուսային ցուցանիշներ են»,-հայտարարեց նա:
