Ե՛ւ Հայաստանը, եւ՛ Լեռնային Ղարաբաղը ունեն բավարար ուժեր, բավարար միջոցներ՝ իրենց պաշտպանությունն ու անվտանգությունն ապահովելու համար, եւ Ադրբեջանի հուլիսյան ագրեսիային ջախջախիչ հակահարվածը դա եւս մեկ անգամ հաստատեց: Այս մասին «Ինտերֆաքս»-ին տված հարցազրույցում հայտարարեց Հայաստանի արտաքին գործերի նախարար Զոհրաբ Մնացականյանը:
Պատասխանելով այն հարցին, թե ինչ պետք է նախաձեռնել՝ հետագայում նման դեպքերից խուսափելու համար, նախարարը նշեց, որ ցավալի է դիտարկել ատելության մթնոլորտի հրահրումը ոչ միայն մեր տարածաշրջանում, այլեւ այն տարածաշրջանից դուրս տեղափոխելու փորձը: «Խաղաղ կարգավորման գործընթացում Հայաստանի համար կարեւոր սկզբունք է առավելագույն ջանքերի գործադրումը՝ խաղաղության համար նպաստող մթնոլորտ ստեղծելու համար: Անհնար է վարել խաղաղ բանակցային գործընթաց՝ ատելության, պատերազմի հռետորաբանության եւ ուժի կիրառման սպառնալիքի մթնոլորտի առկայության պայմաններում: Անիմաստ է բանակցություններում առաջընթաց ակնկալել, երբ Ադրբեջանը մի կողմից ատելություն է հրահրում, մյուս կողմից` բառերով, ձգտում է խաղաղության: Անհնար է «հայատյացության», ռազմատենչ հռետորաբանության պայմաններում ենթադրել, որ մենք կարող ենք իրական առաջընթաց ունենալ բանակցություններում»,- հայտարարեց ԱԳՆ ղեկավարը:
Նրա խոսքերով՝ հետագայում նման բախումներից խուսափելու համար նախ պետք է գիտակցել խաղաղ գործընթացի անհրաժեշտությունը: Պետք է լինի քաղաքական կամք եւ պետք է լինեն կոնկրետ միջոցներ: «Մենք բանակցություններ ենք վարում, այդ թվում` տարբեր կոնկրետ քայլերի շուրջ, որոնք կօգնեն նվազեցնել այս հռետորաբանությունը եւ ատելության սրումը: Այս բլոկն ունի կոնկրետ բովանդակություն, կան բազմաթիվ առաջարկներ մեր կողմից, ԵԱՀԿ Մինսկի խմբի համանախագահների կողմից: Այս բոլոր գաղափարները պետք է իրականացվեն: Մենք լավ օրինակ ունենք, երբ անցյալ տարի կարողացանք իրականացնել Բաքվից, Երեւանից եւ Ստեփանակերտից լրագրողների փոխանակման նախագիծ: Արդյունքները գուցե համեստ, բայց շատ կարեւոր են: Սա ամբողջ խաղաղ գործընթացի կարեւոր մասն է»,- հիշեցրեց նախարարը:
«Այն, ինչ տեղի ունեցավ հուլիսի 12-ին, իրականում 2016-ի ապրիլից հետո ուժի կիրառումը կրկնելու եւ Հայաստանին ու Արցախին (Լեռնային Ղարաբաղ - ԻՖ) ռազմական գործողությունների միջոցով միակողմանի զիջումներ պարտադրելու փորձ էր: Հուլիսի 12-ին հարձակում կատարվեց Հայաստանի հյուսիս-արեւելքում՝ Տավուշի մարզում գտնվող մեր սահմանային դիրքերի վրա: Օգտագործվեց զգալի քանակությամբ զենք եւ տեխնիկա, այդ թվում՝ հրետակոծության ենթարկվեց խաղաղ բնակիչությունը եւ քաղաքացիական ենթակառուցվածքը: Հայաստանը վճռականորեն հակահարված տվեց այս ագրեսիային՝ վերահաստատելով, որ այս հակամարտությունը ռազմական լուծում չունի: Ե՛ւ Հայաստանը, եւ՛ Լեռնային Ղարաբաղը ունեն բավարար ուժեր, բավարար ռեսուրսներ իրենց պաշտպանությունն ու անվտանգությունն ապահովելու համար, եւ հուլիսյան ագրեսիային ջախջախիչ հակահարվածը դա եւս մեկ անգամ հաստատեց»,- եզրափակեց արտգործնախարարը:
