Հաշվի առնելով աշխարհագրական առանձնահատկությունները՝ Հայաստանը պետք է կամ մշտապես փոխի իր ռազմաօդային միջոցները, եթե խոսում ենք Սու-30ՍՄ-ի մասին, կամ էլ արդիականացնի դրանք, եթե խոսում ենք Սու-25-ի մասին: Այս մասին այսօր՝ սեպտեմբերի 2-ին, Մոսկվա-Երեւան տեսակամուրջի ժամանակ հայտարարեց ռուս ռազմական փորձագետ Ալեքսեյ Լեոնկովը:
Նրա խոսքով՝ Սու-30ՍՄ-ն ունիվերսալ է, այն թույլ է տալիս զսպել հակառակորդի ուժերը հեռու մատույցներում, սակայն ակնհայտ է, որ անհրաժեշտ է մեծացնել դրանք քանակն ու գնել եւս 8 ինքնաթիռ: Բացի տեխնիկական վերազինումից, կարեւոր է Մոսկվայի հետ սերտ համագործակցությունը:
«Լուրջ վտանգի դեպքում Հայաստանի համար շատ դժվար կլինի միայնակ հակազդել , եւ Ռուսաստանի հետ դաշնակցային համաձայնագրերը կարող են հավելյալ պաշտպանիչ ուժ ստեղծել»,-ասաց Լեոնկովը:
Ինչ վերաբերում է Սու-25-ի արդիականացմանն ու վերանորոգմանը, ՌԴ պատվավոր ռազմական օդաչու Վլադիմիր Պոպովի խոսքով՝ նման միջոցները կարող են լուծել հարցերի լայն շրջանակ՝ հաշվի առնելով, որ համակարգն ունակ է բարձր ճշգրտության զենքի էֆեկտ ստեղծել:
Հիշեցնենք, որ օգոստոսի 24-ին ՀՀ ՊՆ-ն եւ ռուսական «Միացյալ ավիաշինարարական կորպորացիան» «Բանակ-2020» միջազգային ռազմատեխնիկական ֆորումի շրջանակում համաձայնագիր են ստորագրել Սու-25 կործանիչների արդիականացման եւ վերանորորգման մասին: Քննարկվում է Սու-30ՍՄ կործանիչների գնման շարունակությունը: