ՀՀ վարչապետ Նիկոլ Փաշինյանը Բելառուսի նախագահ Ալեքսանդր Լուկաշենկոյին շնորհավորել է նախագահի պաշտոնում վերընտրվելու կապակցությամբ, եւ դա ՀՀ իշխանությունների եւ մեր երկրի պաշտոնական դիրքորոշումն է: Հենց այդ պատճառով մեզ մտահոգում է այն, ինչ տեղի է ունենում եղբայրական Բելառուսում: Այս մասին Մոսկվա-Մինսկ-Երեւան-Բիշքեկ-Թբիլիսի տեսակամրջի ընթացքում հայտարարեց «Ինտեգրացիա եւ զարգացում» ՀԿ նախագահ, ՀՀ Հանրային պալատի անդամ, ԱԺ նախկին պատգամավոր, Եվրասիական փորձագիտական ակումբի համակարգող Արամ Սաֆարյանը:
Խոսելով 2018 թվականին տեղի ունեցած հեղափոխության մասին՝ նա նշեց, որ դա դրական է ազդել Ռուսաստանի հետ հարաբերությունների վրա:
«Այդ ժամանակ Հայաստանում ժողովուրդը կարծում էր, որ երկրում տիրում է կոռուպցիա, ամենաթողություն, եւ ցանկություն էր առաջացել վրեժխնդիր լինել իշխանություններից: Անցել է 2 տարի, եւ ես պետք է ասեմ, որ շատ խոստումներ կատարվել են, եւ շատ խոստումներ էլ չեն կատարվել: Հեղափոխության աջակիցները քչել են, սակայն, այնուամենայնիվ, հասարակական կարծիքի հարցումները ցույց են տալիս, որ մեծամասնությունն աջակցում է նոր իշխանություններին: Նրանք, ի դեպ, սկսել են լավ վերաբերվել Ռուսաստանին: Նրանք ավելի ռուսամետ են դարձել»,-ասաց Սաֆարյանը:
Նա նշեց, որ Հայաստանում վերջին 2 տարում հակառուսական հռետորաբանություն չկա: «Նոր իշխանությունն ակտիվորեն հանդես է գալիս ՀԱՊԿ-ում, ԱՊՀ-ում, ԵԱՏՄ-ում Հայաստանի մասնակցության օգտին: Թավշյա հեղափոխությունից հետո Ռուսաստանի հետ պառակտում տեղի չունեցավ՝ չնայած նրան, որ իշխանության մեջ կան արեւմտամետ գործիչներ»,-հավելեց Սաֆարյանը:
