Երրորդ սերնդի Nissan Qashqai-ի սերիական արտադրությունը ստիպված են եղել հետաձգել մինչ 2021 թվականի ապրիլ, հայտնում է Financial Times-ը: Պատճառը կորոնավիրուսի համավարակի հետեւանքով ֆինանսական դժվարություններն են:
Թերթի տվյալներով՝ նոր սերնդի քրոսովերի արտադրությունը նախատեսվում էր սկսել այս տարվա հոկտեմբերին, սակայն ճապոնական արտադրողը պաշտոնապես չի հաստատել այս տեղեկությունը: Նախատեսվում է, որ Qashqai-ն կարտադրվի Մեծ Բրիտանիայի Սանդերլենդ քաղաքում գտնվող գործարանում, որի մեջ 400 միլիոն ֆունտ սթեռլինգ է ներդրվել։
Իր իսկ աղբյուրներին հղումով՝ Financial Times-ը հայտնում է, որ հետաձգման հիմնական պատճառը կորոնավիրուսն է, որը ֆինանսական դժվարություններ է առաջացրել եւ ազդել է Nissan-ի արտադրական ծրագրերի վրա: Բացի այդ, ճապոնական ընկերությանը կարող է անհրաժեշտ լինել ճշգրտումներ կատարել իր ծրագրերում, եթե Մեծ Բրիտանիան ձգձգի Եվրամիության հետ Brexit առեւտրային համաձայնագրի կնքումը:
Սանդերլենդի գործարանում տարեկան արտադրվում է մոտ կես միլիոն մեքենա: Դրա կեսն արտահանվում է Եվրոպա, իսկ այդ կեսի մոտ մեկ երրորդը Qashqai-ն է կազմում: Փորձագետները ենթադրում են, որ ԵՄ նոր առեւտրային տուրքերը կարող են վտանգել Nissan-ի գործող բիզնես-մոդելը եւ քրոսովերների վաճառքը, գրում է Motor-ը:
Ակնկալվում է, որ երրորդ սերնդի Nissan Qashqai-ը կստանա վերափոխված արտաքին՝ նեղացված լուսարձակներով, բայց կպահպանի ավանդական V-աձեւ ցանցը: Մեքենան կմեծանա չափերով, կզրկվի սրահի անալոգային կոճակների մեծ մասից եւ կստանա թվային սարքեր: Ուժային սարքերի շարքում կլինեն միայն չափավոր եւ լիցքավորվող հիբրիդներ: