Պաշտպանությունը մնում է իր կարծիքին. այս գործընթացում տուժածներ չեն կարող լինել: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Արամ Վարդեւանյանը:
Հիշեցնենք, որ այսօր դատարանը պաշտպանական կողմի փաստարկներն անհիմն ճանաչեց, ըստ որոնց գործով անցնող տուժածներին եւ նրանց իրավահաջորդներին պետք է վկաների կարգավիճակ տրվի: «Սահմանադրական կարգը տապալելու գործով տուժածներ չեն կարող լինել: Դա կա՛մ Սահմանադրությունն է, կա՛մ 3 միլիոն բնակչությունը: Երկու դեպքում էլ դա աբսուրդ է»,- նշեց Վարդեւանյանը` հավելելով, որ դատախազ Գեւորգ Բաղդասարյանն ուղղակիորեն նշել է, որ գործը չի վերաբերում մարդկանց մահվան հանգամանքներին: Նույնը ասացին դատախազ Բիշարյանը եւ նույնիսկ ՀՔԾ պետ Սասուն Խաչատրյանը:
Խոսելով երկակի ստանդարտների մասին` փաստաբանը հիշեցրեց մեղադրող կողմի արձագանքը նախորդ նիստին փաստաբան Միհրան Պողոսյանի բացակայության կապակցությամբ (այսօր դատարանը հարգալից համարեց Պողոսյանի բացակայությունը - խմբ.): «Սակայն այսօր դատախազները, չգիտես ինչու, չխոսեցին Տիգրան Եգորյանի (տուժած կողմի ներկայացուցիչ - խմբ.) բացակայության մասին: Չնայած նա ընդհանրապես դատարանին ոչ մի տեղեկություն չէր տրամադրել: Դատարանը պարտավոր չէ հետեւել մամուլի ասուլիսներին եւ եզրակացություններ անել»,- ասաց փաստաբանը: Երեկ Եգորյանը հայտնեց, որ դատախազության գործողությունների պատճառով որոշ անձինք խուսափել են պատասխանատվությունից, ինչի կապակցությամբ տուժածները, իրավահաջորդները եւ ներկայացուցիչները դադարեցնում են իրենց մասնակցությունը մարտի 1-ի գործընթացին :
Պատասխանելով գործով դատախազների պաշտոնների բարձրացման եւ գործընթացի հետ կապի մասին հարցին` փաստաբանը նշեց, որ դատախազների բարձր մասնագիտական մակարդակը, սակայն խոստովանեց, որ բոլոր նրանք, ով կապված է եղել Ռոբերտ Քոչարյանի հետապնդման հետ, պարգեւներ են ստացել:
