ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանն այսօր՝ սեպտեմբերի 9-ին, մամուլի ասուլիսի ժամանակ անդրադարձավ դատական գործընթացում տուժածների ներկայության հարցին:
Մեկնաբանելով իրավիճակը՝ Ալումյանը հիշեցրեց, որ հարցի քննարկումը վաղուց է սկսվել, սակայն ավարտին չի հասցվել տուժած կողմի ներկայացուցիչ Տիգրան Եգորյանի բացակայության պատճառով: Դատարանն անհրաժեշտ է համարել նրա կարծիքը լսելը եւ ապա հետաձգել է նիստը: Սակայն Եգորյանը նիստին ներկա չի եղել եւ նույնիսկ չի տեղեկացրել դատարանին իր բացակայության պատճառների մասին:
«Մարդկան մահվան հետ կապված հարցերը քննարկվում են գործի շրջանակում, որը գտնվում է ՀՔԾ վարույթում: Մեր գործում դա չի քննարկվում»,-նշեց Ալումյանը:
Նա հիշեցրեց, որ դատախազությունը գործում տուժածների հայտնվելը բացատրել է նրանով, որ բոլոր նրանք, ովքեր տուժող են ճանաչվել նախնական գործում, պահպանում են կարգավիճակը: «Այդ դեպքում հարց՝ ինչու են 228-ից միայն 102-ը ներառված մեր գործում, սակայն նիստին գալիս է 4-5 մարդ: Ընտրության չափանիշներն անհասկանալի են: Միգուցե, ընտրել են նրանց, ովքեր պատրաստ են մեղքը գցել պարոն Քոչարյանի վրա: Եթե ոչ, ապա բացատրեք»,-նշեց փաստաբանը:
Նրա խոսքով՝ տպավորություն է ստեղծվում, որ գործով դատախազները վետոյի իրավունք ունեն քննարկվող հարցերի համար:«Եթե նրանք դեմ են ինչ-որ բանի, դատարանը դա գնահատում է որպես վետո եւ արդեն ի վիճակի չէ որեւէ այլ որոշում կայացնել: Միակ միջնորդությունը, որը դատարանը բավարարել է, դա Սեյրան Օհանյանին բժշկական նպատակներով երկրից դուրս գալու թույլտվությունն էր: Ոչ մի այլ միջնորդություն չի բավարարվել: Հավանաբար, այն պատճառով, որ յուրաքանչյուր միջնորդությունից հետո դատախազները առարկում են, եւ դատարանը դա գնահատում է որպես վետո»,-հավելեց Ալումյանը: