Մենք կադրային հարցեր չենք լուծում, դա Արցախի նախագահն է որոշում եւ նշանակումներ անում. Մենք կարող ենք ծրագիր մշակել, տվյալ նախարարը չկարողանա դա իրականացնել, բայց դա արդեն անվտանգության խորհրդում հաստատված ծրագիր է լինելու եւ այդ նախարարը հեռանալու է: Այս մասին այսօր՝ սեպտեմբերի 9-ին, Արցախի Աժ-ում պատգամավորների հետ հանդիպման ժամանակ նշել է Արցախի անվտանգության խորհրդի քարտուղար Սամվել Բաբայանը:
Նա հավելեց, որ դա ինքը չի որոշում, այլ Անվտանգության խորհրդում 10-ից ավելի մարդ կա, որոնց ղեկավարում է երկրի նախագահը:
Հարցին, թե արդյոք ունեն փորձառու փորձագետներ ռազմավարական ծրագրեր մշակելու համար, Սամվել Բաբայանը պատասխանեց, որ ունեն լավ թիվ, սակայն մարդիկ աշխատում են 6 ամիս փորձաշրջանով. «Երիտասարդներն այսօր ավելի լավ են տիրապետում եւ կարողանում խնդիրների լուծումները տալ, քան փորձառություն ունեցողները: Մեծ փորձառություն ունեցողները ընդհանրապես չեն ուզում ոչինչ փոխվի: Մեր ներկայացրած փաստաթղթերից կերեւա՝ փորձագետներ ունենք, թե ոչ»: