Հայաստանը չպետք է միջամտի Վրաստանի խորհրդարանի՝ Ռուսական կայսրությունում չերքեզների ցեղասպանությունը ճանաչելու վերաբերյալ քննարկումներին, քանի որ սա ռուս-վրացական պատերազմի շարունակությունն է, պարզապես մեկ այլ՝ հոգբանական մակարդակով։ NEWS.am-ի թղթակցի հետ զրույցում այս մասին հայտարարեց քաղաքագետ Երվանդ Բոզոյանը։
Նրա խոսքով, չերքեզ ժողովրդի ցեղասպանության ճանաչման հարցը վրացական կողմի պատասխանն է Ռուսաստանի կողմից Աբխազիայի եւ Հարավային Օսեթիայի նվաճմանը։ «Ըստ էության, այս հանգամանքը վերջնականապես կփչացնի վրաց-ռուսական հարաբերությունները։ Եթե հաշտեցման փոքր հնարավորություն կար, ապա չերքեզների ցեղասպանության ճանաչումը կզրոյացնի այդ հնարավորությունը։ Այս իրավիճակում Հայոց ցեղասպանությունը ճանաչելու պահանջով հանդես գալը ճիշտ չի լինի։ Դա կնվաստացնի մեզ եւ Ցեղասպանության փաստը։ Հայոց ցեղասպանությունը անվիճելի փաստ է, որը ճանաչել են հեղինակավոր շատ երկրներ»,- ասաց Բոզոյանը։
Նշենք, որ Վրաստանի խորհրդարանը մայիսի 20-ին կողմ է քվեարկել չերքեզ ժողովրդի ցեղասպանության ճանաչմանը։ Խոսքը 1763-1864 թվականների իրադարձությունների մասին է։
