Թուրքական Լաոդիքեայի տարածքում հնագետները հայտնաբերել են քրիստոնեական հնագույն տաճարներից մեկը, որը թվագրվում է 313- 320թթ-ին, հաղորդում է «ՌԻԱ Նովոստին»` վկայակոչելով գերմանական KNA գործակալությանը:
Արշավախմբի ղեկավար Ցելալ Սիմսեկի խոսքով` տաճարը կառուցվել է 313թ. Միլանյան հրովարտակից անմիջապես հետո, որով վերջ տրվեց Հռոմեական կայսրությունում քրիստոնյաների հետապնդմանը:
Փորձագետի կարծիքով` հաշվի առնելով տաճարի նշանակությունը, թուրքական իշխանությունները դրա բացմանը կարող են հրավիրել Հռոմի Պապ Բենեդիկտոս XVI-ին եւ ուղղափառ պատրիարքների: Հուշարձանի կոնսերվացման աշխատանքները շարունակվելու են մոտ մեկ տարի:
Լաոդիքեան գտնվում է Թուրքիայի հարավ-արեւմուտքում: Այնտեղ որոշ ժամանակ բնակվել է Հովհաննես առաքյալը, ով այդ տեղանքի մասին հիշատակում է Հայտնության գրքում: Լաոդիքեա քաղաքը հիմնադրվել է մ.թ.ա. III դարում` Դիոպոլիս քաղաքի տեղում: Մեր թվարկության I դարում քաղաքն անցել է Հռոմեական կայսրությանը, որի անկումից հետո էլ անցել է Բյուզանդիային, իսկ 1097 թ-ին գրավվել է թուրքերի կողմից:
