Կորոնավիրուսը հանգեցրել է սոցիալ-տնտեսական դժվարությունների, բայց Հայաստանում սոցիալական կամ տնտեսական փլուզման կանխատեսումները չարդարացան եւ չեն արդարանա: Այս մասին սեպտեմբերի 16-ին Ազգային ժողովի նիստում ասաց վարչապետ Նիկոլ Փաշինյանը՝ պատասխանելով «Լուսավոր Հայաստան» կուսակցության պատգամավոր Արկադի Խաչատրյանի հարցին:
Վարչապետի խոսքերով՝ կա հստակ վիճակագրություն:
«Որեւէ կասկած չկա, որ կորոնավիրուսը սոցիալ-տնտեսական դժվարություններ է բերել, բայց կանխատեսումները, որ Հայաստանում սոցիալական կամ տնտեսական փլուզում է տեղի ունենալու, չեն իրականացել, եւ դա ակնհայտ է: Իրավիճակը կառավարելի է»,- վստահեցրեց Փաշինյանը:
Նա նաեւ նշեց, որ կա կապիտալ ծախսերի հետ կապված ավանդական խնդիր, բայց կառավարությունը ջանքեր է գործադրում աշխատանքներն ակտիվացնելու ուղղությամբ: Փաշինյանն ասաց, որ աշնանը կիրականացվեն նոր նախագծեր, որոնք կխթանեն շինարարությունն ու տնտեսության այլ ոլորտները:
Վարչապետն այնուհետեւ ընդգծեց, որ այս տարի շատ մարդիկ զբաղվել են գյուղատնտեսությամբ:
«Մենք բուսական մի շարք արտադրանքների արտահանման զգալի աճ ենք ունեցել, ավելացել է փոքր եղջերավոր անասունների արտահանումը, եւ աճել է աշխատատեղերի թիվը: Եւ մոնիթորինգի հարցը մեր օրակարգի ամենակարեւոր հարցերից մեկն է: Մենք պետք է կողմնորոշվենք եւ հասկանանք, թե ինչ գործողություններ պետք է ձեռնարկենք այս տարվա աշնանը տնտեսական ակտիվությունը խթանելու համար, որպեսզի մեր սոցիալ-տնտեսական իրավիճակը մնա կառավարելի»,- ասաց Փաշինյանը:
