Պաշտոնական Թբիլիսին արձագանքել է Լեռնային Ղարաբաղում իրավիճակի սրմանը՝ պատրաստակամություն հայտնելով ցանկացած կերպ նպաստել Ադրբեջանի եւ Հայաստանի միջեւ հակամարտության ապաէսկալացիային, ասված է Վրաստանի ԱԳՆ-ի հայտարարության մեջ:
«Մենք մտահոգությամբ հետեւում ենք Ադրբեջանի եւ Հայաստանի միջեւ հերթական ռազմական լարվածությանը, որը, տարածված տեղեկությունների համաձայն, արդեն հանգեցրել է զոհերի եւ ավերածությունների: Հույս ունենք, որ կողմերին կհաջողվի հրադադարի շուրջ համաձայնության գալ, սկսել բանակցությունները եւ կանխարգելել լայնածավալ ռազմական գործողությունները, որոնք չափազանց բացասաբար են ազդում ամբողջ տարածաշրջանի անվտանգության վրա»,-ասված է հայտարարության մեջ, հաղորդում է Նովոստի-Գրուզիա-ն:
Վրաստանը կոչ է անում ԵԱՀԿ Միսնկի խմբի համանախագահներին եւ միջազգային դերակատարներին բոլոր ջանքերն ուղղել էսկալացիայի կանխարգելմանն ու կառուցողական երկխոսության վերականգնմանը:
«Մեր կողմից հայտարարում ենք, որ Վրաստանը պատրաստ է ցանկացած կերպ նպաստել ապաէսկալացիային եւ տարածաշրջանում խաղաղության հաստատմանը»,-ասված է հայտարարության մեջ: