Մեզ պատերազմ են հայտարարել, եւ հակառակորդը ցանկանում է ոչնչացնել մեզ: Այդ մասին սեպտեմբերի 27-ին Հայաստանի Ազգային ժողովի արտահերթ նիստի ժամանակ երկրում ռազմական դրություն եւ համընդհանուր զորահավաք հայտարարելու մասին հարցը քննարկելիս հայտարարել է Հայաստանի խորհրդարանի նախագահ Արարատ Միրզոյանը:
Նա, մասնավորապես, նշել է, որ Ադրբեջանը ցանկանում է ստանալ Ղարաբաղն առանց դրա բնակչության:
«Բանաստեղծություններից, որոնք ադրբեջանցի երեխաներն անցնում են մանկապարտեզում, ադրբեջանական դասագրքերից պարզ է դառնում, որ նրանք հայերին համարում են որպես թշնամիներ: Ադրբեջանի նպատակը մեզնից յուրաքանչյուրին ոչնչացնելն է. դա փաստ է: Եւ մեր գործողությունները պետք է ելնեն ստեղծված իրավիճակի ընկալումից: Կշեռքի նժարին հայ ազգի գոյության հարցն է»,-ընդգծել է խոսնակը:
Միրզոյանը նաեւ նշել է, որ հայ ժողովուրդն այլընտրանք չունի:
«Մենք պետք է մարտչնենք բոլոր հնարավոր միջոցներով: Մենք պետք է մարտնչենք ապրելու համար, որպեսզի մեր երեխաներն ապրեն: Տասնամյակներ շարունակ մեր գոյության մասին հարցը ներառվել է օրակարգում: Դեռեւս հին ժամանակներից մենք բազմաթիվ թշնամիներ ենք ունեցել, սակայն նրանցից շատերն արդեն անհետացել են: Մենք կստիպենք մեր թշնամուն խաղաղություն հաստատել: Ղարաբաղի անկախությունն ու ֆիզիկական անվտանգությունը, Հայաստանի անկախությունն ու ֆիզիկական անվտանգությունը վիճարկման առարկա չեն: Մենք կհաղթենք. իրադարձությունների այլ զարգացում պարզապես չի կարող լինել»,-ամփոփել է Հայաստանի խորհրդարանի խոսնակը:
Հիշեցնենք, որ կիրակի՝ սեպտեմբերի 27-ին, Ադրբեջանի Զինուժը, կոպտորեն խախտելով միջազգային հումանիտար իրավունքի գործող նորմերն ու հակամարտության լուծման խաղաղ բանակցային գործընթացի տրամաբանությունը, կիրառելով հրթիռահրետանային միջոցներ եւ ավիացիա, հարձակվել է շփման գծի ամբողջ երկայնքի ուղղությամբ՝ թիրախավորելով Պաշտպանության բանակի մարտական դիրքերն ու Ղարաբաղի խաղաղ բնակավայրերը:
