Եվրոպայի անվտանգության եւ համագործակցության կազմակերպության (ԵԱՀԿ ԽՎ) Խորհրդարանական վեհաժողովի նախագահ Գիորգի Ծերեթելին կոչ է արել Հայաստանին եւ Ադրբեջանին վերսկսել բանակցությունները ԵԱՀԿ Մինսկի խմբի համանախագահների հովանու ներքո Լեռնային Ղարաբաղում իրավիճակի սրման կապակցությամբ: Այս մասին ասվում է ԵԱՀԿ ԽՎ մամուլի հաղորդագրությունում, որը հրապարակվել է կիրակի օրը, փոխանցում է ՏԱՍՍ-ը:
«Կոչ եմ անում երկու կողմերին դադարեցնել ռազմական գործողությունները` ի շահ այդ տարածքում բնակվող խաղաղ բնակիչների եւ վերսկսել բանակցությունները ԵԱՀԿ Մինսկի խմբի համանախագահների հովանու ներքո` հակամարտության երկարաժամկետ կարգավորման նպատակով»,- ասված է Ծերեթելիի հաղորդագրության մեջ: «Ես խորապես անհանգստացած եմ այս վերջին սրման կապակցությամբ, հատկապես` քաղաքացիական անձանց մահվան մասին հաղորդագրությունների եւ տարածաշրջանային անվտանգության համար սպառնալիքների»: Ծերեթելին նշել է, որ կողմերը պետք է ձեռնարկեն բոլոր անհրաժեշտ միջոցները` տեղերում իրավիճակը կայունացնելու համար, քանի որ քաղաքական լուծմանն այլընտրանք չկա:
Իր հերթին, ԵԱՀԿ ԽՎ գլխավոր քարտուղար Ռոբերտո Մոնտելլան հիշեցրել է, որ ԵԱՀԿ ԽՎ-ն շարունակելու է որպես ֆորում ծառայել` Ադրբեջանի եւ Հայաստանի խորհրդարանականների միջեւ երկխոսության համար: «ԵԱՀԿ ԽՎ-ն պատրաստ է խորհրդարանական բանակցություններ վարել կողմերի միջեւ, եթե դա պահանջեն երկու կողմերը,- ասել է նա:- Չնայած Մինսկի խումբը ԵԱՀԿ պլատֆորմ է, որտեղ այս վեճը, ի վերջո, պետք է լուծվի, վեհաժողովը կարող է լրացնել այդ ջանքերը` օգնելով ամրապնդել վստահությունը կողմերի միջեւ»:
