Դաշնային դատավորը ժամանակավորապես արգելափակել է TikTok հավելվածի ներբեռնման վրա սահմանած ԱՄՆ նախագահ Դոնալդ Թրամփի արգելքը, հայտնում է NPR ռոդիոն։
TikTok-ի փաստաբան Ջոն Հոլլը պնդել է, որ մոտ 100 մլն ամերիկացի օգտատեր ունեցող հավելվածը «քաղաքային հարթակի ժամանակակից տարբերակ» է։ Նրա խոսքով՝ TikTok-ի ներբեռնման արգելքը խախտում է խոսքի ազատության իրավունքները։
Արդյունքում Կոլումբիա շրջանի ԱՄՆ շրջանային դատարանի դատավոր Կառլ Նիկոլսը կասեցրել է TikTok-ի ներբեռնման արգելքը, որը պետք է ուժի մեջ մտներ կիրակի կեսգիշերին։
Ընդ որում՝ դատավորը մերժել է հայցվորների խնդրանքը երկրում հավելվածի արգելքի մասին որոշումը նոյեմբերի 12-ից արգելափակելու մասին։
ԱՄՆ վարչակազմի հրամանի համաձայն՝ սեպտեմբերի 27-ից TikTok-ը երկրի տարածքում սմարթֆոնների հավելվածների խանութներից պետք է վերացվեր։ Այսպիսով, նոր օգտատերերը չէին կարողանա այն բեռնել, իսկ մյուսները թարմացումներին հասանելիություն չէին ունենա, ինչն արդյունքում հավելվածը կդարձներ չգործող։
Թրամփի վարչակազմը որոշում էր ընդունել ինչպես TikTok-ը, այնպես էլ Tencent Holdings Ltd.-ին պատկանող WeChat-ը Նահանգներում արգելափակելու մասին՝ համարելով, որ չինական ծառայությունները սպառնալիք են կրում ԱՄՆ ազգային անվտանգության համար, քանի որ ամերիկացիների անձնական տվյալներին հասանելիություհն ունեն։ TikTok-ի դեպքում շարունակում է մնալ ամերիկյան գործողությունները տեղական ընկերություններին վաճառելու հնարավորությունը։