Ֆրանսիայի նախագահ Էմանուել Մակրոնը ուժեղացրել է ճնշումը Լիբանանի առաջնորդների վրա, որպեսզի նրանք կառավարություն ձեւավորեն` հայտարարելով, որ առաջընթացի բացակայությունը «կոլեկտիվ դավաճանություն է», փոխանցում է AFP-ն:
Լիբանանը շարունակում է քաղաքական եւ տնտեսական ճգնաժամի մեջ մնալ, որի վերջը չի երեւում այն բանից հետո, երբ շաբաթ օրը երկրի նորանշանակ վարչապետը հրաժարական տվեց` կառավարության ձեւավորման բանակցությունների ձախողումից հետո:
Մակրոնը սուր քննադատության է ենթարկել լիբանանյան քաղաքական էլիտային, որը, նրա խոսքով, մտածում է իրենց եսասիրական շահերի մասին, այլ ոչ թե` իր երկրի շահերի:
«Նրանք որոշեցին խախտել այս պարտավորությունը (կառավարություն ձեւավորելու)», - լրագրողներին ասել է Մակրոնը` հայտարարելով, որ «ամաչում է» երկրի ղեկավարների համար: «Նրանք բոլորը խաղադրույք կատարեցին վատագույն սցենարի վրա` իրենց, իրենց ընտանիքի կամ իրենց տկլանի շահերի փրկության համար,- ասել է նա:- Ուստի ես որոշեցի ի գիտություն ընդունել այս կոլեկտիվ դավաճանությունը եւ լիբանանյան պաշտոնյաների` բարեխղճորեն գործելուց հրաժարվելը»:
Սեպտեմբերի սկզբին Մակրոնի` Լիբանան կատարած այցի ընթացքում քաղաքական կուսակցությունները խոստացան երկու շաբաթվա ընթացքում կառավարություն ձեւավորել:
Պայթյունից հետո Մակրոնը երկու անգամ այցելեց Ֆրանսիայի նախկին պրոտեկտորատ, վերջին այցի ընթացքում հանդիպեց «Հեզբոլլահ»-ի ներկայացուցիչների հետ, քանի որ փորձում է բոլոր քաղաքական կուսակցություններին ներգրավել երկիրը ճգնաժամից դուրս բերելու ճանապարհային քարտեզի իրագործման մեջ:
Օգոստոսին համաշխարհային առաջնորդներն ավելի քան 250 միլիոն եվրո էին խոստացել տրամադրել երկրին: