Քաղաքակիրթ աշխարհի կողմից ադրբեջանական ագրեսիան պետք է արժանանա համապատասխան գնահատականի եւ զսպող միջոցառումների։ Այս մասին սեպտեմբերի 28-ին ԱԺ արտահերթ նիստում ասաց խորհրդարանի ԲՀԿ-ական փոխնախագահ Վահե Էնֆիաջյանը։
Նրա խոսքով՝ հայկական կողմի ջանքերը պետք է ուղղված լինեն այն բանին, որ ռազմական եւ դրանցից բխող գործողություններն ուղղվեն ճշմարտությունը տեղ հասցնելուն եւ միջազգային հանրության կարծիքի ձեւավորմանը՝ հստակ փաստերի ներկայացմամբ։
Էնֆիաջյանը նշեց, որ Ազգային ժողովի պատգամավորները՝ անկախ քաղաքական համոզմունքներից, արդեն համապատասխան ուղերձներ են հղել խորհրդարանական բարեկամության խմբերին, խորհրդարանական եւ ոչ խորհրդարանական տարբեր կառույցներին, ինչպես նաեւ հեռախոսազրույցներ են ունեցել։ «Մոտ ապագայում այս գործողություններին պատասխաններ կհետեւեն»,- շեշտեց պատգամավորը՝ հավելելով, որ Ադրբեջանին սանձահարելու համար անհրաժեշտ է է՛լ ավելի մեծ ջանքեր ներդնել։
ԲՀԿ-ական պատգամավորը, մասնավորապես, առաջարկեց միջազգային հանրության ուշադրությունը կենտրոնացնել այս սադրիչ ռազմական գործողություններին Թուրքիայի փաստացի մասնակցության վրա։ Նա պատահական չհամարեց այն փաստը, որ շփման գծում իրավիճակի սրման արդեն առաջին րոպեներին թուրքական պետական հեռուստատեսությամբ ռեպորտաժ հայտնվեց հայկական կողմից իբր պատերազմի բռնկման մասին։
