Այն փաստը, որ Վրաստանն արգելում է ռազմական բեռների տեղափոխումը Հայաստանի համար, նորություն չէ: Այս մասին սեպտեմբերի 28-ի ուշ երեկոյան կայացած ճեպազրույցում ասել է Արցախի արտգործնախարար Մասիս Մայիլյանը` պատասխանելով հարցին այն մասին, որ «Վրաստանը արգելում է ռուսական ռազմական բեռները Հայաստանի համար, իսկ բեռները տեղափոխվում են Կասպից ծովով եւ Իրանով»:
«Պետք է օգտագործել այն հնարավորությունները, որոնք կան: Այն, որ Վրաստանն արգելում է ռազմական բեռների փոխադրումը, նորություն չէ: Մեկնաբանելու բան չկա: Սրանից առաջ եւս տեղեկություններ կային, որ բեռները տեղափոխվում են շրջանցիկ ճանապարհով»,- հիշեցրել է նախարարը:
Ինչ վերաբերում է այն հանգամանքին, որ Վրաստանը չի արգելում այդպիսի բեռների տեղափոխումն Ադրբեջանի համար, Մայիլյանը նշեց, որ այստեղ պայմանավորվածություն է գործում: «Ես չեմ արդարացնում: Ես կցանկանայի, որպեսզի աշխատեր երկաթուղին ՌԴ-ից եւ տեղափոխեր մեզ անհրաժեշտ բեռները: Սակայն պետք է հաշվի առնել վրաց-ռուսական եւ վրաց-իսրայելական հարաբերությունները»,- եզրափակել է Մասիս Մայիլյանը: