Շվեյցարիան աջակցում է ԵԱՀԿ Մինսկի խմբի համանախագահների ջանքերին, որոնք ուղղված են ղարաբաղյան հիմնախնդրի լուծմանը բանակցությունների միջոցով, եւ պատրաստակամություն է հայտնում բարձր մակարդակի հանդիպումներ անցկացնել Հայաստանի եւ Ադրբեջանի միջեւ իր տարածքում: Այս մասին ասվում է Շվեյցարիայի արտաքին գործերի նախարարության հայտարարության մեջ, փոխանցում է ՏԱՍՍ-ը:
«Շվեյցարիան անվերապահորեն աջակցում է [ԵԱՀԿ] Մինսկի խմբի համանախագահների ջանքերին` հակամարտությունը բանակցային ճանապարհով լուծելու համար եւ պատրաստակամություն է հայտնում հանդիպումներ ընդունել ամենաբարձր մակարդակով, ինչպես դա արել է նախկինում», - ասել է երկրի ԱԳՆ-ն: Բեռնը մտահոգված է սեպտեմբերի 27-ին Հայաստանի եւ Ադրբեջանի միջեւ «դաժան բախումների» սրման կապակցությամբ, հայտարարել է ԱԳՆ-ն: Շվեյցարիան կողմերին կոչ է անում «տարածաշրջանային կայունություն պահպանել» եւ «ուժ չկիրառել», նշվում է հաղորդագրության մեջ:
Ինչպես շեշտել են դիվանագիտական գերատեսչությունում, Շվեյցարիան «երկու կողմերին հիշեցնում է, որ նրանք պետք է կատարեն իրենց պարտավորությունները` միջազգային իրավունքին համապատասխան, այդ թվում` քաղաքացիական անձանց պաշտպանության հարցում»: Ըստ Շվեյցարիայի ԱԳՆ-ի` անհրաժեշտ է որքան հնարավոր է շուտ վերսկսել առանց նախապայմանների առարկայական բանակցությունները, քանի որ «դա միակ ճանապարհն է, որը կարող է հակամարտության խաղաղ կարգավորման հանգեցնել»:
