ՌԴ-ում մարդու իրավունքների հարցերով հանձնակատար Տատյանա Մոսկալկովան Հայաստանից եւ Ադրբեջանից իր գործընկերներին կոչ է արել նպաստել ԼՂ հակամարտության խաղաղ կարգավորմանը:
«Խորին ցավով տեղեկանում ենք ԼՂ հակամարտության գոտում խաղաղ բնակչության շրջանում զոհերի մասին, կարեկցանք ենք հայտնում զոհվածների հարազատներին եւ մտերիմներին: ՄԱԿ-ի ձեւավորման օրվանից ծանր պատմական իրադարձություններ ենք վերապրել՝ կապված միջպետական կոնֆլիկտների հետ, եւ կարողացել ենք համոզվել, որ բոլոր դրանք կապված են մարդու իրավունքների զանգվածային խախտման հետ: Հատկապես հիմա՝ ՄԱԿ-ի ձեւավորման 75-ամյակի տարում, դա լավ ենք գիտակցում եւ հուսով ենք, որ հակամարտության կողմերը կգործադրեն բոլոր ջանքերը՝ ՄԱԿ-ի եւ մարդու հիմնարար իրավունքների եւ ազատությունների խախտումները թույլ չտալու համար:
Դիմում եմ իմ գործընկերներին՝ Ադրբեջանի Հանրապետությունում եւ Հայաստանի Հանրապետությունում մարդու իրավունքների հարցերով հանձնակատարներին. Ձեր պետությունների կառավարություններին կոչ արեք զսպվածություն ցուցաբերել եւ ընդունել հնարավոր միջոցներ, որոնք կհանգեցնեն խնդրի լուծմանը ոչ թե զենքով եւ ուժով, այլ բանակցությունների եւ երկխոսության ճանապարհով: Վստահ եմ՝ դրսեւորված մարդկայնությունը թույլ կտա խուսափել բռնությունից եւ պաշտպանել մարդու հիմնարար իրավունքները: Իմ կողմից պատրաստ եմ աջակցել այս դժվարին իրավիճակում»,-ասվում է Մոսկալկովայի հայտարարության մեջ:
