Հենրիխ Բյոլի անվան հիմնադրամի հարավկովկասյան բաժնի ղեկավար Շտեֆան Մայստերը բավականին բարձր է համարում Հայաստանի եւ Ադրբեջանի միջեւ լայնամասշտաբ պատերազմի ռիսկը:
Փորձագետը DW-ին տված հարցազրույցում նշել է, որ դրան գումարվել է աշխարհաքաղաքական անբարենպաստ իրավիճակը՝ ԱՄՆ-ի ինքնամեկուսացումը, թուլացած Եվրամիությունը, Թուրքիայի բացահայտ աջակցությունը Ադրբեջանին:
Մայստերը չի բացառում, որ վերջերս Ադրբեջանում տեղի ունեցած թուրք-ադրբեջանական մանեւրներից հետո Ադրբեջանում մնացել են թուրքական տեխնիկա եւ զինծառայողներ: Նրա կարծիքով՝ հակամարտության ապաէսկալացիան մեծ մասամբ կախված է Ռուսաստանի եւ Թուրքիայի փոխգործակցությունից:
«Կանաչների» կուսակցությունից Եվրախորհրդարանի պատգամավոր Սերգեյ Լագոդինսկին կարծում է, որ հակամարտության սրման մեջ շահագրգռված է առաջին հերթին Ադրբեջանը, որը «ռազմական առումով ավելի ուժեղ է Հայաստանից» եւ որին օգնում է Թուրքիան:
Հատկանշական է, որ ԼՂ-ում ռազմական բախումները բռնկվել են Թուրքիայի եւ Կիպրոսի միջեւ Արեւելյան Միջերկրական ծովում կոնֆլիկտի ֆոնին: Լագոդինսկիի կարծիքով՝ «Անկարան ԼՂ-ում ձգտում է հերթական անգամ ցույց տալ իր տարածաշրջանային աշխարհառազմավարական նշանակությունը»:
Նա ուշադրություն է դարձրել նաեւ Ռուսաստանի կոնտրպրոդուկտիվ դերին, որը , նրա գնահատմամբ, հայամետ դիրքորոշում է, սակայն Ռուսաստանը զենք է վաճառում թե Հայաստանին, թե Ադրբեջանին: «Որոշումը կարող է լինել միայն Ռուսաստանի եւ Թուրքիայի մասնակցությամբ»,-նշել է Լագոդինսկին: Նրա խոսքով՝ երկու կողմերը պետք է դադարեցնեն զենքի մատակարարումները հակամարտող երկրներին:
