ԱՄՆ տիեզերական ուժերի ստորաբաժանումները մի օր ուղեծիր դուրս կբերվեն: Այս մասին հայտարարել է Տիեզերական օպերացիաների հրամանատարության ղեկավար, գեներալ-մայոր Զոն Է. Շոուն, հայտնում է Air Force Magazine-ը:
«Ինչ-որ պահի, այո, մենք մարդկանց կուղարկենք տիեզերք,- ասել է նա:- Նրանք կարող են հրամանատարական կենտրոններ ղեկավարել լուսնային միջավայրում կամ էլի ինչ-որ տեղ»:
Նա հավելել է, որ տիեզերքում ռազմական օբյեկտները կարող են մասամբ ինքնավար լինել, ուստի մարդիկ կարող են դրանց շուրջօրյա չհետեւել: Տիեզերական ուժերը ցանկանում են, որպեսզի իրենց արբանյակներն աստիճանաբար ինքնակառավարվող դառնան, այդ թվում` ծրագրային ապահովման ավտոմատ թարմացումը կամ մանեւրները վտանգի դեպքում: «Մարդկանց երբեւէ պատրաստած լավագույն ռոբոտներն արբանյակներն են: Դրանք անհավանական մեքենաներ են, եւ մենք միայն կատարելագործվում ենք»,- ասել է Շոուն: «Մեքենայական ուսուցման եւ արհեստական բանականության շնորհիվ մենք հսկայական քանակությամբ ավտոմատացված եւ ինքնավար համակարգեր կունենանք, որոնք կգործեն երկրային, լուսնային եւ արեգակնային ուղեծրերում առաջիկա օրերին եւ տարիներին` տիեզերական գործունեություն ծավալելով ազգային անվտանգության շահերից»:
«Բայց մի սպասեք, որ Տիեզերական ուժերի անձնակազմը մոտ ժամանակներս կլքի Երկիրը. Դա տեղի կունենա ինչ-որ պահի»:
«Մենք չենք պայքարում Լուսնի կամ Մարսի նկատմամբ վերահսկողության համար, մենք պետք է ապահովենք տիեզերական ներուժի առկայությունը երկրի վրա գտնվող մարդկանց համար»,- ավելի վաղ հայտարարել էր Տիեզերական ուժերի հրամանատարի տեղակալ, գեներալ-լեյտենանտ Դեյվիդ Դ. Թոմփսոնը:
