Կորոնավիրուսի պատվաստանյութերը կարող են հայտնվել մինչեւ 2021 թվականը, կարեւոր կլինի դրանք մատչելի դարձնել աղքատ երկրներին: Այդ մասին չորեքշաբթի օրը հայտարարել է ամերիկացի գործարար եւ Microsoft-ի հիմնադիրներից Բիլ Գեյթսը՝ ելույթ ունենալով համավարակի դեմ պայքարի համար միջոցների արդարացի բաշխման ՄԱԿ-ի ACT-Accelerator նախաձեռնության մեկնարկի միջոցառմանը, հայտնում է ՏԱՍՍ-ը:
«Կորոնավիրուսի դեմ պատվաստանյութը, հավանաբար, պատրաստ կլինի հաջորդ տարվա սկզբին: Իրականում մենք, ամենայն հավանականությամբ, արդեն կունենանք մի քանի պատվաստանյութ»,- ասել է նա: «Այս պատվաստանյութերը թույլ կտան մեզ միլիոնավոր կյանքեր փրկել: Դրանք նաեւ հնարավորություն կտան մեզ մշակել ծրագիր, որը կհանգեցնի աշխարհում COVID-19-ի ամբողջական ոչնչացմանը»,- հավելել է Գեյթսը:
Սակայն այդ նպատակին հասնելու համար, ըստ գործարարի, անհրաժեշտ է արտադրել միլիարդավոր դոզանների պատվաստումներ, ֆինանսավորել դրանց գնումները եւ մշակել ամբողջ աշխարհում պատվաստանյութեր առաքելու համակարգ: «Ավելի ցածր եկամուտ ունեցող երկրները չունեն նույն գնողունակությունը, ինչ զարգացած երկրները, ուստի կա ռիսկ, որ նրանք չեն ունենա բավարար չափաբաժիններ»,- զգուշացրել է Գեյթսը
«Ուստի ես ուրախ եմ տեղեկացնել 16 դեղագործական ընկերությունների եւ Բիլ ու Մելինդա Գեյթսերի հիմնադրամի միջեւ այսօր ստորագրված նոր համաձայնագրի մասին: Դրանում ընկերությունները համաձայնում են արագացնել պատվաստանյութերի արտադրությունը եւ հնարավորինս շուտ ապահովել դրանց լայն տարածումը»,- նշել է նա: