Ադրբեջանի ներկայիս ագրեսիային Թուրքիայի մասնակցությունը պատահական չէ: Այս մասին սեպտեմբերի 30-ի ուշ երեկոյան կայացած ճեպազրույցում հայտարարեց Արցախի նախագահ Արայիկ Հարությունյանը:
Նրա խոսքով, տանդեմը ձեւավորվել է երկար տարիներ, իսկ Թուրքիայի հավակնությունները հարյուրամյակներ ազդում են Հայաստանի ու Արցախի վրա: Հարությունյանը խոստացավ ապագայում ավելի մանրամասն ներկայացնել Թուրքիայի «ճանապարհային քարտեզը», բայց առայժմ ընդգծեց, թե պետք է ասի, որ դրանք չեն հաջողվի:
«Մենք ունենք հերոսական ժողովուրդ եւ երիտասարդներ, ովքեր կյանքի գնով պատրաստ են պաշտպանել իրենց հայրենի հողը: 18-ամյա տղան հարվածել է 9 միավոր զրահատեխնիկայի եւ շարունակում է ծառայել հայրենիքին: Կան վետերաններ, որոնք մասնակցել են առաջին պատերազմին, ապրիլյան եւ ներկա պատերազմին, որոնց հաջողվել է 2 օրվա ընթացքում 3 միավոր տեխնիկա խլել թշնամուց, եւ այժմ նրանք օգտագործվում են ադրբեջանցիների դեմ: Մեր հայրենակիցը նռնակների կապոցը վերցրած մտավ թշնամու խրամատները, ոչնչացրեց այնքան, որքան կարողացավ, եւ վերջում պայթեցրեց իրեն նրանց հետ: Կա մի հայրենակից, ով թողել է բարեկեցիկ կյանքը Եվրոպայում, ունեցվածքը եւ եկել է պայքարելու ու պաշտպանելու հայրենիքը: Որովհետեւ մենք այլ երկրներում վարձկաններ չենք փնտրում, եւ նրանց մեր գլխին խնդիր չենք դարձնում: Իր պատմության ընթացքում Արցախը չի գրավվել եւ չի գրավվի»,- ընդգծեց Արայիկ Հարությունյանը: