Վիրավորված լրագրողների վերաբերյալ Ադրբեջանի ԱԳՆ-ի հայտարարությունները բացարձակ անթույլատրելի են եւ ուղղված միայն պատասխանատվությունը վերագրելուն: Այդ մասին հոկտեմբերի 1-ին լրագրողների հետ հանդիպման ժամանակ հայտարարել է Հայաստանի Մարդու իրավունքներ պաշտպան Արման Թաթոյանը:
«Հակամարտության եւ ռազմական գործողությունների գոտիներում լրագրողների, հատկապես միջազգային անկախ ԶԼՄ-ների գործունեությունն ամբողջովին լեգիտիմ է: Հայաստանի օմբուդսմենի՝ ԶԼՄ-ների ազատության հարցերով ԵԱՀԿ ներկայացուցչին ուղղված գրավոր հարցման պատասխանում հստակ նշված է, որ Ղարաբաղում լրագրողների աշխատանքը կրում է լեգիտիմ բնույթ, եւ դեռ ավելին, այն միտված է պատերազմի պայմաններում մարդու իրավունքների երաշխիքների դերի ամրապնդմանը:
Դա կարեւոր է լրագրողական առաքելության անկողմնակալ իրականացման համար, որն ուղղված է միջազգային հանրությանն օբյեկտիվ իրականությունը ներկայացնելուն: Ավելին, անկախ ԶԼՄ-ների ներկայությունը ողջունելի է, իսկ լրագրողների աշխատանքը խոչընդոտելը, ինչպես դա տեղի է ունենում Ադրբեջանում, միջազգային իրավունքի խախտում է:
Լրագրողները հավասարազոր են քաղաքացիական բնակչությանը եւ պաշտպանված միջազգային հումանիտար իրավունքով, եւ հակամարտության գոտում լրագրողի գտնվելը նշանակում է, որ նա պետք է լինի պաշտպանված եւ չդառնա զինվորականների թիրախը: Այսօր ֆրանսիացի լրագրողներին կրակելու կապակցությամբ կարեւոր է նշել, որ նրանք եղել է հատուկ նշաններով հանդերձանքով, տեղաշարժվել են քաղաքացիական ավտոմեքենայով, իսկ հրաձգության են ենթարկվել Մարտունու քաղաքապետարանի հարեւանությամբ: Կանխավարկածը, անշուշտ, լրագրողների կողմից է»,-նշել է օմբուդսմենը:
Հիշեցնենք, որ ամբողջ աշխարհում հայտնի Le Monde ֆրանսիական պարբերականի լրագրողները հայտնվել են Ադրբեջանի ԶՈՒ կողմից հրաձգության ներքո Մարտունի քաղաքում, ինչի հետեւանքով ստացել են ծանր վիրավորում:
