Նոր ապացույցներ են հայտնվում առ այն, որ սիրիացի զինյալներին որպես վարձկաններ են հավաքագրում` ղարաբաղյան հակամարտության գոտում Ադրբեջանի կողմից ռազմական գործողություններին մասնակցելու համար, հայտնում է CNN-ը:
CNN-ը զրուցել է մի սիրիացու հետ, ով համաձայնել է Սիրիայի հյուսիսից մեկնել Ադրբեջան: Տղամարդը, ով հրաժարվել է նշել իր իրական անունը, ասել է, որ ապրում է Սիրիայի հյուսիսում` Աֆրին շրջանում, բայց ծնունդով Դամասկոսից է:
Նա ասել է, որ այսպես կոչված «Սիրիայի ազգային բանակի» անդամ է, որին աջակցում է Թուրքիան: Դրա ղեկավարը խնդրել էր գրանցվել նրանց, ով պատրաստ է մեկնել Ադրբեջան: «Ես դա արեցի կամավոր, եւ իմ ստորաբաժանման 90 տոկոսը գրանցվել է»,- ասել է նա CNN-ին: «Նրանք ասացին, որ մեզ ամսական 1500 դոլար կվճարեն: Մեր պայմանագրերը նախատեսված են երեք ամսվա համար, եւ մենք ամեն ամիս գումար ենք ստանալու զորամասի հրամանատարից»,- ասել է նա` հավելելով, որ չգիտի, թե ով է ֆինանսավորել օպերացիան:
Մարտիկը, ում հետ կապվել է CNN-ը, ասել է, որ զինյալները հավաքվում էին Հավար Քիլիս շրջանում` սիրիա-թուրքական սահմանի մոտ, եւ սպասում էին տեղափոխմանը:
CNN-ի հետ կապ հաստած մարտիկներից մեկը` երեք երեխաների հայր, ասել էր, որ իր ընտանիքն աղքատության շեմից այն կողմ է ապրում: Նա պատրաստ էր մեկնել Ադրբեջան «փողի համար, եւ ամբողջ աշխարհը գիտի, որ այստեղ ապրող սիրիացիները սովից մեռնում են»: Նրա խոսքով` իրենք հավատում էին, որ պաշտպանություն կիրականացնեն, «սակայն զինյալների առաջին խմբաքանակի` Ադրբեջան գնալուց հետո իմացանք, որ խոսքը ռազմական գործողությունների մասին է, ինչպիսիք են մարտերը Սիրիայում եւ Լիբիայում»: «Մենք իմացանք, որ սա պատերազմ է, այլ ոչ թե աշխատանք անվտանգության ընկերությունում»,- ասել է նա:
Նա հայտնել է, լսել, որ հավաքագրվել է «շուրջ 1000 եւ ավելի մարտիկ»: «Իմ հարազատներից ոչ ոք առաջին խմբաքանակի հետ չի գնացել, բայց ես գիտեմ տղաների, ով գնացել է»,- ասել է նա CNN-ին: Նա նաեւ լսել է, որ Ադրբեջանում սպանվել է մի քանի սիրիացի:
Մարդը, ով նախկինում հյուսն էր, ասել է, որ ուզում է, որպեսզի կյանքը բարելավվի, եւ գնում է Ադրբեջան միայն փողի համար: «Ես ուզում եմ, որպեսզի պատերազմն ավարտվի Ադրբեջանում եւ Հայաստանում, բայց սա միակ աշխատանքն է, եւ այս կերպ ես դեռ կարող եմ ապահովել իմ երեխաներին սննդով եւ կյանքով»:
Այս տարվա սկզբին CNN-ը հայտնել էր, որ տասնյակ սիրիացի գրոհայիններ են հավաքագրվել թուրքական ռազմական կապալառուների կողմից` Լիբիայում անցումային կառավարության անունից կռվելու համար:
Թուրքիայի նախագահ Ռեջեփ Թայիփ Էրդողանը փետրվարին ասել էր, որ Սիրիայի ազգային բանակի անդամները մեկնել են Լիբիա` կառավարությանն աջակցելու համար:
